ရွှေဖီမြေ၊ ဇန်နဝါရီ ၂၀ ရက်၊ မြောက်ဦး
ရခိုင်ပြည်နယ် မြောက်ဦးမြို့ထဲ စစ်သုံ့ပန်း ထားရှိတဲ့ ရမ်းချောင်းအနီးတဝိုက်ကို စစ်တပ်က ဂျက်ဖိုက်တာနဲ့ ၃ ကြိမ် ဗုံးကြဲတိုက်ခိုက်ခဲ့တာကြောင့် ကလေးငယ်နဲ့အမျိုးသမီးအပါအဝင် ၂၈ ဦး သေဆုံးခဲ့ပြီး ၂၅ ဦး ဒဏ်ရာ ရခဲ့တယ်လို့ အာရက္ခတပ်တော်- AA က မနေ့ ဇန်နဝါရီ ၁၉ ရက်မှာ ထုတ်ပြန်ပါတယ်။
ဇန်နဝါရီ ၁၈ ရက်က လေကြောင်းကနေ ဗုံးကြဲတိုက်ခိုက်ခဲ့တာဖြစ်ပြီး ဒဏ်ရာရရှိသူတွေထဲမှ တချို့က အရေးပေါ် ဆေးကုသမှု ခံယူနေရပြီး ဒဏ်ရာပြင်းထန်သူ ရှိတာကြောင့် နောက်ထပ် သေဆုံးသူ ရှိလာနိုင်တယ်လို့ ဆိုပါတယ်။
သေဆုံး ဒဏ်ရာရရှိတဲ့ စစ်သုံ့ပန်းမိသားစုဝင်တွေကို အာရက္ခဒေသ စစ်ပွဲအတွင်း ဖမ်းဆီးရမိခဲ့တာဖြစ်ပြီး စစ်တပ် မိသားစုဝင်တွေကို ပြန်လွှတ်ပေးဖို့ စီစဉ်ထားပြီးတော့ စစ်ရှောင်စခန်းမှာ ယာယီ ထိန်းသိမ်းထားတာလို့လည်း ဆိုပါတယ်။
စစ်ရှုံးနေတဲ့ စစ်တပ်က စာသင်ကျောင်း၊ ဆေးရုံဆေးခန်း၊ ဈေး၊ ဘာသာရေးအဆောက်အုံ၊ လမ်းတံတား၊ စစ်ဘေးရှောင်စခန်းနဲ့ လူနေထူထပ်တဲ့နေရာတွေကို ပစ်မှတ်ထား တိုက်ခိုက်နေပြီး ရာဇဝတ်မှုကို နေ့စဉ်နဲ့အမျှ ကျူးလွန်နေတယ်လို့ ပြောဆိုထားပါတယ်။
၂၀၂၅ ခုနှစ် နှစ်ဆန်းပိုင်းကစပြီး လေကြောင်း တိုက်ခိုက်မှုကို စစ်တပ်ဘက်မှ ခပ်စိပ်စိပ် လုပ်လာတာကြောင့် လေကြောင်းရန်နဲ့ လေကြောင်း အန္တရာယ်ကို အရင်ကထက် ပိုမိုသတိထားကြဖို့ အင်တာနက်၊ ဖုန်းသုံးစွဲမှုကိုလည်း သတိထား သုံးစွဲကြဖို့လည်း သတိပေး တိုက်တွန်းထားပါတယ်။
