မိုင်းရူပ၊ မတ်လ ၁၄ ရက်
တအာင်းတပ်မတော်- PSLF/TNLA နဲ့ ကချင်တပ်မတော်- KIO/KIA တို့အကြား နယ်မြေအငြင်းပွားမှုကို နိုင်ငံရေးနည်းလမ်းနဲ့ ဖြေရှင်းဖို့ အမျိုးသား ညီညွတ်ရေးအစိုးရ- NUG က ကြေညာချက်ထုတ်ပြန်ပြီး တိုက်တွန်းထားပါတယ်။
ရှမ်းမြောက်မှာ နှစ်တပ်အကြား ဖြစ်ပွားနေတဲ့ မြေပြင်အငြင်းပွားမှုတွေကို တော်လှန်ရေးအင်အားစုနဲ့ ဒေသခံလူထုတွေက စိုးရိမ်ပူပန်မှု ဖြစ်ပေါ်နေပြီး တော်လှန်ရေးအဖွဲ့အစည်းဟာ လူထုတွေရဲ့ လိုအပ်ချက်ကို ဖြည့်ဆည်းပေးဖို့ တာဝန်ရှိသူတွေ ဖြစ်တယ်လို့ ဆိုပါတယ်။
လက်ရှိ ဖြစ်ပွားနေတဲ့ မြေပြင်အငြင်းပွားမှုကို နှစ်ဖက်ခေါင်းဆောင်ဘက်က နိုင်ငံရေးနည်းလမ်းနဲ့သာ ဖြေရှင်းမယ်လို့ ကြားသိရတဲ့အတွက် NUG အနေနဲ့ ကြိုဆိုတယ်လို့ ဖော်ပြထားပါတယ်။
နှစ်ဖက်တပ်အကြား ဖြစ်ပွားနေတဲ့ နယ်မြေအငြင်းပွားမှုကို နိုင်ငံရေးနည်းလမ်းနဲ့ ဖြေရှင်းရာမှာ NUG အနေနဲ့ ကူညီဆောင်ရွက်ဖို့ အသင့်ရှိကြောင်း ဆိုပါတယ်။
ပြီးခဲ့တဲ့ မတ်လ ၇ ရက်မှာ ကွတ်ခိုင်မြို့ထဲ KIA က အင်အား ရာချီ လက်နက် အပြည့်အစုံနဲ့ ဝင်ရောက်ဖို့ ကြိုးစားရာကနေ အငြင်းပွားမှု ဖြစ်ပွားခဲ့ပြီး ကွတ်ခိုင်မြို့ရှိ KIA ရဲ့ ဆက်ဆံရေးရုံးကို TNLA က ဝင်ရောက်စီးနင်းခဲ့ရာ ထိုးကြိတ်မှု ဖြစ်ပွားခဲ့ပါတယ်။
ကွတ်ခိုင်ဒေသခံ လူငယ်အမျိုးသားတစ်ဦးကလည်း TNLA နဲ့ KIA အကြား ဖြစ်ပွားနေတဲ့ နယ်မြေအငြင်းပွားမှုတွေကို လူမျိုးရေးပဋိပက္ခမဖြစ်အောင် ထိန်းထိန်းသိမ်းသိမ်းနဲ့ ဆောင်ရွက်ဖို့ တိုက်တွန်းလိုတယ်လို့ ရွှေဖီမြေကို ပြောပါတယ်။
“နွေဦးတော်လှန်ရေးက ပြီးတဲ့ကာလ မဟုတ်တဲ့အတွက် တိုင်းရင်းသား အဖွဲ့အစည်းတွေကြားထဲမှာ ဒီလိုပြဿနာတွေ ဖြစ်နေတာ့ ပြည်သူလူထုအနေနဲ့ ဘယ်သူ့ကို သွားပြီး အားကိုးရမလဲ ဖြစ်တာပေါ့နော်။ ငါတို့ အားကိုးတဲ့ လက်နက်ကိုင်အဖွဲ့တွေ ဒီလိုဖြစ်နေတာလားဆိုတာတွေပေါ့” လို့ ပြောဆိုပါတယ်။
KIA ရဲ့ ပြောခွင့်ရသူ ဗိုလ်မှူးကြီး နော်ဘူကတော့ TNLA နဲ့ KIA အကြား ဖြစ်ပွားနေတဲ့ နယ်မြေအငြင်းပွားမှုကို နှစ်ဖက်တပ်အပြင် ရှမ်းမြောက်က လူထုတွေနဲ့ပါ တွေ့ဆုံဖို့ ပြင်ဆင်နေတယ်လို့ ရွှေဖီမြေကို ပြောဆိုထားပါတယ်။
TNLA ရဲ့ ပြောခွင့်ရသူ လွေးယေဦးကလည်း နှစ်ဖက်တပ်အကြား ဖြစ်ပွားနေတဲ့ နယ်မြေအငြင်းပွားမှုကို နိုင်ငံရေးနည်းလမ်းနဲ့ ဖြေရှင်းသွားမယ်လို့ မီဒီယာတွေမှာ ဖြေကြားထားပါတယ်။
၂၀၂၅ ဇန်နဝါရီလကစပြီး ရှမ်းမြောက် နမ့်ခမ်းမြို့နယ် မိုင်းဝီးရွာ၊ မန်တုံနဲ့ ကွတ်ခိုင်မြို့နယ်မှာ KIA နဲ့ TNLA အောက်ခြေတပ်သားတို့ ပွတ်တိုက်မှု မကြာခဏ ဖြစ်ပွားနေပါတယ်။
TNLA နဲ့ KIA ဟာ မြောက်ပိုင်းမဟာမိတ်ဖြစ်တဲ့အပြင် “ဝ”တပ်- UWSA ဦးဆောင်တဲ့ ပြည်ထောင်စုနိုင်ငံရေး ဆွေးနွေးညှိနှိုင်းမှုကော်မတီ- FPNCC ရဲ့ အဖွဲ့ဝင်လည်း ဖြစ်ပါတယ်။
