ဇူလိုင် ၂၄ ရက်၊ ရွှေဖီမြေ
“နာဂ” ကျေးရွာခံ လူငယ်ရာနဲ့ချီကို ကချင်လွတ်လပ်ရေးတပ်မတော် – KIA က တပ်သားအဖြစ် စုဆောင်းခဲ့တဲ့လုပ်ရပ်နဲ့ တပ်ဖွဲ့ဝင် ၁၆ ဦးကို ဖမ်းဆီးတဲ့ လုပ်ရပ်တွေဟာ နာဂလူမျိုးတို့ကို ဆော်ကားခြင်းဖြစ်တယ်လို့ “နာဂ”ကျောင်းသားအဖွဲ့ – NSO က ထုတ်ပြန်ခဲ့ပါတယ်။
ထုတ်ပြန်ချက်ကို မနေ့ ဇူလိုင် ၂၂ ရက် ရက်စွဲနဲ့ ထုတ်ပြန်ထားပြီး စစ်ကောင်စီတပ်အာဏာသိမ်းပြီး ၂၀၂၁ နောက်ပိုင်း KIA က “နာဂ”လူမျိုးတို့အပေါ် ရန်စမှုပြုလုပ်လာတာကို ရှုံ့ချကြောင်း ထုတ်ပြန်တာဖြစ်ပါတယ်။
၂၀၂၁ ခုနှစ်မှာ ကချင်ပြည်နယ်ရှိ ရွှေမှော်၊ ကျောက်မှော်နဲ့ နယ်စပ်တွေမှာရှိတဲ့ “နာဂ” ကျေးရွာခံလူငယ်တွေကို KIA က တပ်သားအဖြစ်ဖမ်းဆီးဆောင်သွားတဲ့ တချို့လူငယ်တွေရဲ့ သတင်းအစအနကိုတောင် မရတော့တဲ့ဖြစ်ရပ်တွေကို “နာဂ” ကျောင်းသားအဖွဲ့က တွေ့ရှိရကြောင်း ဆိုထားပါတယ်။
ဖြစ်ပေါ်နေတဲ့ ကိစ္စရပ်အပေါ် “နာဂ”ကျောင်းသားအဖွဲ့က KIA ခေါင်းဆောင်တွေနဲ့ ၂၀၂၄ ဇွန်လ ၇ ရက်မှာ ငြိမ်းချမ်းတဲ့ နည်းလမ်းနဲ့ဆွေးနွေးဖို့ သွားရာမှာ တားမြစ်တာခံခဲ့ရပါတယ်။
၂၀၂၄ ဇွန်လ ၁၃ရက်နဲလ ၁၄ ရက်မှာ KIA ရဲ့ လက်အောက်ခံအရာရှိနဲ့ ဆွေးနွေးခဲ့ရပေမယ့်လည်း ရေရာတဲ့အဖြေမရရှိခဲ့ဘူးလို့ ဆိုပါတယ်။
ဒါ့အပြင် ပြီးခဲ့တဲ့ ဇူလိုင် ၁၈ ရက်မှာလည်း တနိုင်းမြစ်အနောက်ဘက်မှာရှိ “နာဂ” ကျေးရွာတွေဖြစ်တဲ့ တလူးနဲ့ Lungyone ကျေးရွာအနီးရှိ “နာဂ” တပ်စခန်းက တပ်ဖွဲ့ဝင် ၁၆ ဦးကို လက်နက်နဲ့အတူ KIA တပ်ဖွဲ့က သာလွန်အင်အားနဲ့ ဖမ်းဆီးဆောင်သွားခဲ့ပါတယ်။
KIA ဘက်က အဲဒီအခွန်ကောက်ခံတဲ့ဂိတ်ကို ရုပ်သိမ်းပေးဖို့ အကြိမ်ကြိမ်သတိပေးရာ “နာဂ” ဘက်က ရုပ်သိမ်းခြင်းမရှိတာကြောင့် ဖယ်ရှားခြင်းဖြစ်တယ်လို့ ကချင်ဒေသတွင်း မီဒီယာတွေမှာ ဖော်ပြကြပါတယ်။
ဒါပေမယ့် ကချင်လွတ်လပ်ရေးတပ်မတော် – KIA ရဲ့ လုပ်ရပ်ကို “နာဂ” ကျောင်းသားအဖွဲ့ – NSO အနေနဲ့ ပြင်းထန်စွာရှုံ့ချပြီး ဖမ်းဆီးထိန်းသိမ်းထားတဲ့ တပ်ဖွဲ့ဝင်တွေနဲ့ သိမ်းဆည်းသွားတဲ့ လက်နက်အားလုံးကို အမြန်ဆုံးပြန်လွဲပေးဖို့ တောင်းဆိုထားပါတယ်။
တောင်းဆိုမှုတွေကို လက်မခံဘဲ နှောင်နှေးမယ်ဆိုရင် ပဋိပက္ခကြီးထွားလာနိုင်ပြီး ဖြစ်ပွါးလာမယ့် ပဋိပက္ခတွေကို KIA က တာဝန်ယူရလိမ့်မယ်လို့ ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
