ပို့လဘား၊ မတ်လ ၅ ရက်၊ မိုင်းယော်
ရှမ်းမြောက် လားရှိုးမြို့နယ် မိုင်းယော်တိုက်နယ် လုံမွန်းကျေးရွာက ကိုးကန့်တပ်မတော်(MNDAA) ဖမ်းဆီးထားတဲ့ အသက် ၁၅ နှစ်အရွယ် နန်းယိင်းဟွမ်ဆိုသူဟာ တစ်လကြာတဲ့အထိ ဖမ်းဆီးထားခံရပြီး လက်ရှိအချိန်ထိ ပြန်လွှတ်ပေးတာမရှိသေးဘူးလို့ မိသားစုဝင်နဲ့ နီးစပ်သူအမျိုးသားတစ်ဦးက ရွှေဖီမြေကို ပြောပါတယ်။
ဖမ်းဆီးခံရတဲ့ အမျိုးသမီးငယ်ကို ၎င်းမိဘတွေက MNDAA ဆီ ပြန်လွှတ်ပေးဖို့ အကြိမ်ကြိမ် သွားရောက်တောင်းဆိုခဲ့ပေမယ့် အထက်အမိန့်အရ လွှတ်ပေးခွင့်မရှိသေးကြောင့်သာ MNDAAက ပြန်လည်ပြောဆိုကြောင်း သူကဆိုပါတယ်။
“တစ်ပတ်တစ်ခါတော့ တွေ့လို့ရတယ်ဆိုပြီး သူတို့ပြောတယ်။ သူ့ကိုသွားတွေ့တဲ့အချိန်ဆို သူတို့ကို မေးရင် အထက်က ဘာမှမပြောလာသေးဘူးလို့ ပြောနေတာ။ သူ့ကို ပြန်လွှတ်ပေးဖို့ တောင်းဆိုတာပေါ့နော်။ ဘာကြောင့်ဖမ်းတာလဲလို့ မေးရင်လည်း သူတို့မပြောပြဘူး။ ပြစ်ဒဏ်ချမှတ်တာတွေလည်းမရှိဘူး”လို့ ပြောပါတယ်။
ဖမ်းဆီးခံရတဲ့ အမျိုးသမီးငယ်ကို ပြီးခဲ့တဲ့ ဖေဖော်ဝါရီ ၇ ရက်က ကိုးကန့်တပ်သားအချင်းချင်း ပစ်ခတ်မှု ဖြစ်ပွားရာကနေ တစ်ဦးသေဆုံးခဲ့တာဖြစ်ပြီး အဆိုပါ ပစ်ခတ်မှုဟာ နန်းယိင်းဟွမ်ကြောင့်ဖြစ်တယ်လို့ စွပ်စွဲဖမ်းဆီးခဲ့တာဖြစ်ပါတယ်။
ပြီးခဲ့တဲ့ ဖေဖော်ဝါရီ ၇ ရက်ကတည်းက ဒီနေ့ မတ်လ ၅ ရက်အထိ နန်းယိင်းဟွမ်ကို မိုင်းယော်တိုက်နယ် လွန်မွန်းကျေးရွာမှာသာ ဖမ်းဆီးချုပ်နှောင်ထားနေဆဲဖြစ်တယ်လို့ ပြောပါတယ်။
