ရွှေဖီမြေ၊ ဖေဖော်ဝါရီ ၂၂ ရက်
တည်ငြိမ်အေးချမ်းရေးကို လိုလားတဲ့ ပြည်သူတွေနဲ့ ပူးပေါင်းပြီး စစ်ပွဲတွေ ဆက်လက် ဆင်နွှဲသွားမယ်လို့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောကြားလိုက်ပါတယ်။
မနေ့ ဖေဖော်ဝါရီ ၂၁ ရက်က ရှမ်းတောင် ဗထူးတပ်မြို့မှာ ကျင်းပတဲ့ စစ်ကောင်စီရဲ့ ဗိုလ်သင်တန်းဆင်းပွဲမှာ စစ်ခေါင်းဆောင်က အခုလို ပြောကြားခဲ့တာ ဖြစ်ပါတယ်။
ဒေသတစ်ခုရဲ့ တည်ငြိမ်အေးချမ်းရေးနဲ့ ဖွံ့ဖြိုးတိုးတက်ရေး နောက်ကျအောင် လုပ်ဆောင်နေသူတွေဟာ အဲဒီဒေသမှာ နေထိုင်တဲ့ လူထုနဲ့ ဒေသခံ အကြမ်းဖက်အဖွဲ့တွေသာဖြစ်ပြီး ဥပဒေမဲ့ အကြမ်းဖက်တာ၊ နယ်မြေချဲ့ထွင်ရေး တိုက်ပွဲ ဖော်ဆောင်လာမှုကို ဆက်လက် တိုက်ခိုက်သွားမယ်လို့ စစ်ခေါင်းဆောင်က ပြောကြားခဲ့ပါတယ်။
ဒါ့အပြင် တိုင်းရင်သား လက်နက်ကိုင်အဖွဲ့တွေဟာ အမျိုးသား ညီညွတ်ရေးအစိုးရ- NUG၊ PDF နဲ့ ပူးပေါင်းကာ နယ်မြေ ချဲ့ထွင်ရေးနဲ့ အကြမ်းဖက်မှု ဆက်လုပ်နေတယ်လို့ စစ်ခေါင်းဆောင်က စွပ်စွဲကာ အပြစ်တင်ထားပါတယ်။
ဗထူးတပ်မြို့ဟာ စစ်တပ်နဲ့ တအာင်းတပ်မတော်- TNLA တို့ တိုက်ပွဲ ပြင်းထန်နေတဲ့ နောင်ချိုမြို့နယ် တောင်းခမ်းရွာနဲ့ မိုင် ၈၀ ခန့်အကွာမှာ တည်ရှိပါတယ်။
စစ်တပ်ဟာ ဒီရက်ပိုင်းအတွင်း တော်လှန်ရေးအင်အားစုတွေ ထိန်းချုပ်ထားတဲ့ ဒေသမှာ နေ့စဥ်လိုလို လေကြောင်းတိုက်ခိုက်မှု ပြုလုပ်နေပြီး အရပ်သား ထိခိုက်သေဆုံးမှုလည်း နေ့စဉ် တိုးလာနေပါတယ်။
ပြီးခဲ့တဲ့ ရက်ပိုင်းမှာ စစ်တပ်နဲ့ TNLA ရဲ့ ဆွေးနွေးပွဲရလဒ် မထွက်ဘဲ ပြီးဆုံးပြီးနောက် TNLA ထိန်းချုပ်ထားတဲ့ဒေသကို လေကြောင်း တိုက်ခိုက်မှုနဲ့ ထိုးစစ်ဆင်မှု ဆက်တိုက် လုပ်ဆောင်လာနေတာလည်း ဖြစ်ပါတယ်။
