ယာရူစိင်၊ ဩဂုတ် ၉ ရက်၊ သီပေါ
တအာင်းတပ် PSLF/TNLA ထိန်းချုပ်ထားတဲ့ သီပေါမြို့ပေါ်ကို စစ်တပ်က လေကြောင်းကနေ ထပ်မံဗုံးကြဲတိုက်ခိုက်ခဲ့တယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ ဩဂုတ် ၉ ရက် ညနေ ၄ နာရီခွဲဝန်းကျင်မှာ သီပေါမြို့ ပန်းတိမ်တောင်ရပ်ကွက် ရေဟော်ကျောင်းအနီးကို စစ်တပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာဖြစ်ပါတယ်။
“ရေဟော်ကျောင်းအနီး ဗိုလ်တဲဝန်းကို လာကြဲသွားတာ။ ဗုံး ၂ လုံးထက်မနည်း လာကြဲသွားတာ။ တစ်နေရာထဲကို ကြဲသွားတာ။ အထိအခိုက်တော့ မသိရသေးဘူး” လို့ သီပေါမြို့ခံ အမျိုးသားတစ်ဦးက ပြောပါတယ်။
ဗုံးကြဲတိုက်ခိုက်မှုတာနဲ့ ပတ်သက်ပြီး အချက်အလက်အသေးစိတ် ရွှေဖီမြေက ဆက်လက်စုံစမ်းနေဆဲ ဖြစ်ပါတယ်။
မနေ့ညမှာလည်း တအာင်းတပ် ထိန်းချုပ်ထားတဲ့ ကျောက်မဲမြို့ပေါ်ကို စစ်ကောင်စီတပ်က လေကြောင်းဗုံးကြဲတိုက်ခိုက်ခဲ့ပါတယ်။
သီပေါမြို့ရှိ စစ်တပ်ရဲ့ စခန်းဟောင်းဖြစ်တဲ့ ခြေလျင်တပ်ရင်း (ခလရ-၂၃) တပ်စခန်းထဲကို ပြီးခဲ့တဲ့ ဩဂုတ်လ ၃ ရက်ကလည်း စစ်တပ်က ပေါင် ၅၀၀ ဗုံး ၄ လုံးနဲ့ ကြဲချတိုက်ခိုက်ခဲ့ပါတယ်။
တအာင်းတပ်ထိန်းချုပ်တဲ့ သီပေါမြို့ကို ပြီးခဲ့တဲ့ ဇူလိုင်လကနေ အခု သြဂုတ်လ တစ်လကျော်အတွင်း စစ်တပ်က လေကြောင်းကနေ ၇ ကြိမ် ဗုံးကြဲတိုက်ခိုက်ခဲ့တာကြောင့် ဒေသခံ ၂ ဦး သေဆုံးခဲ့ရပြီး ၅ ဦး ဒဏ်ရာရရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
