လွေးလာဝ်ဇာရ်၊ နိုဝင်ဘာ ၁၄ ရက်၊ နမ့်လန်
ရှမ်းမြောက် သီပေါမြို့နယ် နမ့်လန်မြို့နဲ့ ကျောက်ဂူလမ်းအပြင် ရှမ်းတောင် မိုင်းရယ်မြို့ အဝင်အထွက်ကိုလည်း စစ်ကောင်စီတပ်က ပိတ်ထားတယ်လို့ ဒေသခံတွေဆီက သိရပါတယ်။
နမ့်လန်မြို့ကနေ ကျောက်ဂူလမ်းကို စစ်ကောင်စီတပ်က ပိတ်ပင်ထားတာကြောင့် ကုန်တင်ကား၊ အိမ်စီးကား မှန်သမျှ ဖြတ်သန်းသွားလာလို့ မရဘူးလို့ ဖြစ်စဉ်သိရှိသူ တစ်ဦးက ပြောပါတယ်။
ဖြစ်စဉ်သိရှိသူ တစ်ဦး “အသိတစ်ယောက်က အဲမှာ ပိတ်မိနေတာ။ အရှေ့လည်း သွားမရ။ အနောက်လည်း လှည့်ဖြစ်နေတယ်။ နမ့်လန် ကျောက်ဂူလည်း ပိတ်။ နမ့်လန်အဝင်အထွက်လည်း ပိတ်ထားတယ်” လို့ ပြောပါတယ်။
၎င်းလမ်းကို ရှမ်းတောင် ရပ်စောက်မြို့မှာရှိတဲ့ ဗျူဟာမှူး အမိန့်အရ ပိတ်ရတာ ဖြစ်တယ်လို့ နောက်ထပ်ဒေသခံတစ်ဦးက ပြောပါတယ်။
ဒါ့အပြင် လုံခြုံရေးအရဆိုပြီး ခရီသည်နဲ့ ကားသမားတွေရဲ့ မှတ်ပုံတင်၊ ယာဉ်မောင်းလိုင်စင်နဲ့ စမတ်ကဒ် ကအစ အကုန်သိမ်းသွားတဲ့အပြင် တချို့ကားတွေကို စစ်ဆေးစရာရှိတယ်ဆိုပြီး ရပ်စောက် ဗထူးတပ်ထဲကို မောင်းသွင်းထားတယ်လို့ ဆိုပါတယ်။
နောက်ထပ်ဒေသခံတစ်ဦးက “သူတို့ ခွင့်မပြုသေးပဲ ဘယ်မှ သွားလို့မရအောင် လုပ်တာလို့ထင်တယ်” လို့ ပြောပါတယ်။
အလားတူ ရှမ်းတောင် မိုင်းရယ်မြို့အဝင်အထွက်ကိုလည်း စစ်ကောင်စီတပ်က ပိတ်ထားလိုက်တယ်လို့နောင်ထပ် မိုင်းရယ်ဒေသခံတစ်ဦးက ဆိုပါတယ်။
“ပိတ်ထားတယ်လို့ဘဲ ကြားတယ်။ ဘာကြောင့် ပိတ်တယ်ဆိုတာ မသိရဘူး။ ဟိုယ ဘက်လည်း ပိတ်ထားတယ်လို့ ကြားတယ်” လို့ ပြောပါတယ်။
သီပေါမြို့အထွက် သီပေါ-လားရှိုးတံတားကို ကိုးကန့်တပ်နဲ့ စစ်ကောင်စီတပ်က အပြန်အလှန် ပိတ်ထားတာကြောင့် ဖြတ်သန်းသွားလာလို့ မရဘူးလို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
