လွေးထွေး၊ မတ်လ ၁၈ ရက်၊ မိုးဗြဲ
ရှမ်းတောင် မိုးဗြဲမြို့ထဲကို စစ်ကောင်စီတပ်က လက်နက်ကြီးအပြင် ဒရုန်းနဲ့ပစ်ခတ်တိုက်ခိုက်ခဲ့တာကြောင့် မြို့ထဲက နေအိမ် ၂၀ ဝန်းကျင် မီးလောင်ပျက်စီးခဲ့ရတယ်လို့ သိရပါတယ်။
မိုးဗြဲမြို့ထဲကို ပြီးခဲ့တဲ့ မတ်လ ၁၆ ရက်ကတည်းကနေ ဒီနေ့ မတ်လ ၁၈ ရက်အထိ စစ်ကောင်စီတပ်က လွိုင်ကော်နဲ့ဖယ်ခုံ အမြောက်တပ်ကနေ လက်နက်ကြီး ပစ်ခတ်တိုက်ခိုက်တဲ့အပြင် မိုးဗြဲအနီး စစ်ကောင်စီအခြေချတဲ့ နေရာကနေလည်း ဒရုန်းနဲ့ မီးလောင်ဗုံးတွေ ပစ်ခတ်တိုက်ခိုက်နေတာ ဖြစ်ပါတယ်။
မိုးဗြဲ PDF ရဲ့ တာဝန်ရှိသူတစ်ဦးက “ဒီတလော ဆက်တိုက်ပစ်နေတယ်။ လူထိတာတော့မရှိဘူး။ အကုန်လုံးက စစ်ရှောင်သွားကြတော့ သူတို့အိမ်တွေတော့ မီးတွေလောင်ကုန်တာပေါ့။ စစ်ကောင်စီသုံးတာက ရိုးရိုးဗုံးအပြင် မီးလောင်ဗုံးတွေလည်းပါလို့လေ” လို့ ပြောပါတယ်။
ဒါ့အပြင် မြေပြင်မှာလည်းနေ့တိုင်း တိုက်ပွဲတွေပြင်းထန်နေပြီး မိုးဗြဲမြို့ခံတွေအပါအဝင် အနီးအနားရှိ ကျေးရွာခံတွေကလည်း စစ်ရှောင်နေရတယ်လို့ ဆိုပါတယ်။
ရှမ်း-ကရင်နီနယ်စပ်ရှိ မိုးဗြဲမြို့နယ်ကို စစ်ကြောင်းထိုးလာတဲ့ စစ်ကောင်စီတပ်ကို မိုးဗြဲ PDF တပ်ဖွဲ့နဲ့ KNDF ပူးပေါင်းတပ်ဖွဲ့ တွေက ပူးပေါင်းတိုက်ခိုက်ခဲ့တာကြောင့် မတ်လ ၁၄ ရက်မှာ ပြန်လည်ဆုတ်ခွာသွားခဲ့ရတယ်လို့လည်း ဆိုပါတယ်။
မိုးဗြဲမြို့ကို ပြီးခဲ့တဲ့ ၂၀၂၃ ခုနှစ် နိုဝင်ဘာလထဲမှာ ကရင်နီတော်လှန်ရေးတပ်ပေါင်းစုတို့က တိုက်ခိုက်သိမ်းပိုက်နိုင်ခဲ့ပေမယ့်လည်း မိုးဗြဲမြို့နယ်မှာ အခြေစိုက်တဲ့ စစ်ကောင်စီရဲ့ ခြေမြန်တပ်ရင်း ၄၂၂ တပ်ရင်းကိုတော့ မတိုက်ထုတ်နိုင်ဘဲ အခုထိရှိနေလည်း ဖြစ်ပါတယ်။
