ရွှေဖီမြေ၊ ဧပြီ ၂ ရက်
လေကြောင်း တိုက်ခိုက်မှု နေ့စဉ်နီးပါး လုပ်နေတဲ့ စစ်ကောင်စီတပ်က လူထုတွေကို စာနာတဲ့အနေနဲ့ ရက် ၂ဝ ကြာ ယာယီ အပစ်အခတ် ရပ်စဲမယ်ဆိုပြီး ထုတ်ပြန်လာပါတယ်။
စစ်ကောင်စီ လက်အောက်ခံ ပြန်ကြားရေးဝန်ကြီးဌာနက “ငလျင်ဒဏ်ကြောင့် ထိခိုက်ခံစားနေရသော တစ်နိုင်ငံလုံးရှိ ပြည်သူလူထုအား စာနာထောက်ထား နားလည်သောအားဖြင့်လည်းကောင်း၊ ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများကို အရှိန်အဟုန်ဖြင့် ဆောင်ရွက်နိုင်စေရန် ရည်ရွယ်လျက်လည်းကောင်း တည်ငြိမ်အေးချမ်းမှုကို ရှေးရှုလျက် တပ်မတော်အနေဖြင့် ၂၀၂၅ ခုနှစ် ဧပြီ ၂ ရက်မှ ၂၂ ရက်အထိကာလကို ယာယီ ပစ်ခတ်တိုက်ခိုက်မှု ရပ်စဲရေးကာလအဖြစ် ထုတ်ပြန်လိုက်သည်”ဆိုပြီး ဒီနေ့ည ၈ နာရီခွဲကျော်မှာ ထုတ်ပြန်လာတာပါ။
၂ဝ၁၈ ဒီဇင်ဘာ ၂၁ ရက်ကနေ ၂၀၂၃ ခုနှစ် ဒီဇင်ဘာ ၃၁ ရက်အထိ ပစ်ခတ်တိုက်ခိုက်မှု ရပ်စဲရေးအတွက် ထုတ်ပြန်ချက်ပေါင်း ၂၂ ကြိမ် ထုတ်ပြန်ခဲ့ကြောင်းလည်း ဆက်လက် ဖော်ပြထားပါတယ်။
မတ်လ ၂၈ ရက်က ပြင်းထန်တဲ့ ငလျင် လှုပ်ခတ်မှု ဖြစ်ပွားခဲ့ပြီးနောက် NUG က ၂ ပတ်၊ ညီနောင်မဟာမိတ် ၃ ဖွဲ့က ၁ လကြာ ယာယီ အပစ်အခတ် ရပ်စဲကြောင်း ထုတ်ပြန်ထားပါတယ်။
