ခိုင်လေး၊ ဇန်နဝါရီ ၁၆ ရက်၊ ချောက်
မကွေးတိုင်း ချောက်မြို့နယ် ထိန်စမ်းရွာဘက် အင်အား ၁၀၀ ခန့်နဲ့ စစ်ကြောင်း ထိုးလာတဲ့ စစ်တပ်နဲ့ တော်လှန်ရေးတပ်တို့ ထိတွေ့တိုက်ပွဲ ဖြစ်ပွားခဲ့ပြီး ဒေသခံ ၂ ဦးကို စစ်ကောင်စီတပ်က သတ်ဖြတ်ခဲ့ပါတယ်။
ဒါ့အပြင် ဒေသခံတစ်ဦးကိုလည်း စစ်တပ်က ဖမ်းဆီးသွားတယ်လို့ Chauk Guerrilla Force- CGF က ထုတ်ပြန်ထားပါတယ်။
“ထိန်စမ်း ကျေးလက်ကျန်းမာရေးဌာနနားမှာ ခေါင်းကို တေ့ပြီး နောက်ကနေ ပစ်သတ်သွားတာဗျ။ တစ်ယောက်ကတော့ သေဆုံးသွားပြီး နောက်တစ်ယောက်ကတော့ မိတ္ထီလာ ဆေးရုံကို လွှဲထားရတယ်လို့ သိရတယ်ဗျ” ဆိုပြီး CGF ရဲ့ တာဝန်ခံ ကိုပိုင်က ရွှေဖီမြေကို ပြောပါတယ်။
မနေ့ ဇန်နဝါရီ ၁၅ ရက် မနက်ပိုင်းက တိုက်ပွဲ စတင်ဖြစ်ပွားခဲ့ပြီး စစ်တပ်ဘက်က ၆ ဦးထက်မနည်း ထိခိုက်သေဆုံးခဲ့တယ်လို့ ၎င်းက ဆက်ပြောပါတယ်။
“ထိခိုက်သွားတဲ့သူတွေကို နာရေးကူညီမှုကားနဲ့ လာခေါ်သွားတယ်။ ချောက်မြို့နယ် ပြည်သူ့ဆေးရုံကို ၁၅ ရက်နေ့ ညကလည်း ဆေးရုံကို လုံခြုံရေး ချထားတယ်လို့ သိရတယ်ဗျ”
စစ်တပ်ဘက်က လက်နက်ကြီး လက်နက်ငယ်နဲ့ ရမ်းသမ်းပစ်ခတ်တာရှိပြီး တော်လှန်ရေးတပ်သားဘက်မှ ထိခိုက်တာ မရှိဘူးလို့ ဆိုပါတယ်။
လက်ရှိအချိန်မှာ ထိန်စမ်းရွာတဝိုက် စစ်ရေးတင်းမာနေဆဲဖြစ်ပြီး အရပ်သားလည်းတိမ်းရှောင်နေရတယ်လို့ သိရပါတယ်။
