ပျားကြီး၊ မတ်လ ၃၁ ရက်၊ မန္တလေး
ငလျင်ဒဏ်ကို အလူးအလဲ ခံစားနေရတဲ့ မန္တလေးမြို့မှာ စစ်ကောင်စီက သင်္ကြန်မှာ ပျော်ပါးဖို့အတွက် မဏ္ဍပ်တွေကို အင်တိုက်အားတိုက်နဲ့ ဆောက်လုပ်နေဆဲဖြစ်တယ်လို့ ဒေသခံတွေက ပြောပါတယ်။
ပြီးခဲ့တဲ့ မတ်လ ၂၈ ရက်က မန္တလေးမှာ အင်အားပြင်းငလျင် လှုပ်ခတ်ခဲ့ပြီး လူထောင်နဲ့ချီ သေဆုံးခဲ့သလို ကယ်ဆယ်ပေးဖို့ လိုအပ်နေတဲ့ လူတွေလည်း ဒီနေ့အထိအများစု ကျန်ရှိနေသေးပေမဲ့ စစ်ကောင်စီကတော့ မဏ္ဍပ်ပဲ ဆက်လက် လုပ်ဆောင်နေတာ ဖြစ်ပါတယ်။
“တစ်မြို့လုံး မြို့ပျက်ကြီးလို ဖြစ်နေပြီ။ လူတွေအားလုံး ပူဆွေးသောက ရောက်နေကြတယ်။ ပြိုပျက်နေတဲ့ အဆောက်အဦးတွေထဲမှာ ပိတ်မိနေတဲ့သူတွေ အခုထိ မထုတ်နိုင်သေးဘူး။ နာရီပေါင်း ၇၀ ပြည့်တော့မယ်။ အဲဒါတွေကျ မလုပ်ဘဲ ပျော်ပါးဖို့အတွက် မဏ္ဍပ်တွေ ဆောက်နေတယ်” လို့ အောင်မြေသာစံမြို့နယ်မှ အသက် ၅၀ အရွယ် ဒေသခံအမျိုးသားတစ်ဦးက ပြောပါတယ်။
သင်္ကြန်မဏ္ဍပ် ဆောက်လုပ်မှုကို စစ်ကောင်စီ လက်အောက်ခံ အလယ်ပိုင်းတိုင်းစစ်ဌာနချုပ် တပ်စွဲထားတဲ့ နန်းတွင်းအရှေ့ဖက်၊ ၆၆ လမ်းပေါ်မှာ ဆောက်လုပ်နေတာဖြစ်ပြီး မဏ္ဍပ်ပေါင်း ၅ ခုထက်မနည်း ဆောက်လုပ်နေတာကို မြင်တွေ့နေရတယ်လို့ ဒေသခံတွေက ပြောဆိုပါတယ်။
ဒါ့အပြင် ၂၆ လမ်းပေါ်က မြို့တော်စည်ပင်ခန်းမရှေ့မှာလည်း ဗဟိုမဏ္ဍပ် ဆောက်လုပ်နေတာ တွေ့ရတယ်လို့ ဒေသခံတွေက ပြောပါတယ်။
မန္တလေးမြို့မှာ ငလျင်ဒဏ်ကြောင့် အဆောက်အဦးပေါင်း ထောင်နဲ့ချီပြီး ပြိုကျပျက်စီးခဲ့ပြီးတော့ သေဆုံးသူ ၁ ထောင်ကျော် ရှိနေသလို အဆောက်အဦးပျက်အတွင်းမှာလည်း ရာပေါင်းများစွာသော လူထုတွေက နာရီပေါင်း ၇၀ ကျော်ကြာ ဆက်လက် ပိတ်မိနေဆဲ ဖြစ်ပါတယ်။
