အင်းငယ်၊ မတ်လ ၄ရက်၊ ညောင်ရွှေ
ရှမ်းပြည်တောင်ပိုင်း၊ ညောင်ရွှေမြို့နယ်မှာ ရောက်ရှိနေတဲ့ ကရင်နီ စစ်ဘေးရှောင်တွေကို အခု မတ်လအတွင်း အခြေခံပညာစာသင်ကျောင်း စာမေးပွဲတွေ ပြီးဆုံးပြီးတဲ့ အချိန်မှာ စစ်ကောင်စီက ဖိအားပေး နေရပ်ပြန်ခိုင်းသွားနေတယ်လို့ စုံစမ်းသိရပါတယ်။
ညောင်ရွှေမြို့နယ် ထွေအုပ်ရဲ့ ညွှန်ကြားချက်အရ တောင်ခြေကျေးရွာအုပ်စု အုပ်ချုပ်ရေးမှူး ဦးသိန်းဟန်က ကျေးရွာအသီးသီးရှိ ဘုန်းကြီးကျောင်းတွေမှာ ခိုလှုံနေတဲ့ စစ်ဘေးရှောင်တွေကို နေရပ်ပြန်ခိုင်းနေတာပဲ ဖြစ်ပါတယ်။
တောင်ခြေကျေးရွာရောက် ဖယ်ခုံစစ်ဘေးရှောင် တစ်ဦးက “သူတို့တော့ စာပြန်ပွဲ အကြောင်းပြတာပေါ့။ ကျမတို့လည်း ဟိုမှာ မငြိမ်သေးဘူးဆိုတော့ မပြန်ရဲသေးဘူး။ ပင်လောင်းဘက် သွားကြမလား စဉ်းစားတာပေါ့။ သူတို့ နှင်ထုတ်နေတာ တစ်လပိုင်းကတည်းကဆိုတော့ ဒီတခါ တကယ်ပြန်ရပြီထင်တယ်” လို့ ပြောပါတယ်။
ညောင်ရွှေမြို့မှာ စာပြန်ပွဲ ပြန်လုပ်ချင်တဲ့ မြို့ခံလူတစ်စုက ဘုန်းကြီးကျောင်းမှာ စစ်ဘေးရှောင်တွေ ရှိနေတာကြောင့် စစ်ကောင်စီခန့် ပြည်နယ် ဝန်ကြီးချုပ်ကို အကူအညီတောင်းပြီး နှင်ထုတ်ခိုင်းထားတာလို့ သိရပါတယ်။
လက်ရှိ ညောင်ရွှေမြို့နယ်နဲ့ ထိစပ်နေတဲ့ ဖယ်ခုံမြို့မှာ တိုက်ပွဲပြင်းထန်နေဆဲဖြစ်ပြီး မြို့နယ်တွင်းက ကျေးရွာတွေမှာ စစ်မှုထမ်းခေါ်ယူနေတာကြောင့် ပြန်ဖို့အတွက် စိုးရိမ်မှု ရှိတယ်လို့ ဆိုပါတယ်။
စစ်ဘေးရှောင်အရေး ကူညီဆောင်ရွက်ပေးနေသူ တစ်ဦးက “လက်နက်ကြီးလည်း ကျနေသေးတယ် ပြောတယ်။ ဒီကာလ ပြန်ဖို့တော့ မဖြစ်နိုင်ပါဘူး။ တချို့ဆို အိမ်ပါ မရှိတော့ဘူးလေ။ ဘယ်လိုပြန်မလဲ။ အင်းမြောက်ပိုင်းက ကျောင်းတွေတော့ တက်လာခဲ့ ကူညီပေးမယ်လို့တော့ ခေါ်နေတယ်” လို့ ပြောပါတယ်။
စစ်ကောင်စီခေါင်းဆောင် မင်းအောင်လှိုင်ဟာ ၂၀၂၅ ခုနှစ်အတွင်း ရွေးကောက်ပွဲ ကျင်းပနိုင်ရေးအတွက် ဖယ်ခုံမြို့နယ်ကတဆင့် ကရင်နီပြည်ကို စစ်ကြောင်းထိုးနေတာကြောင့် ညောင်ရွှေမြို့နယ်၊ အင်းလေးဒေသတွင်းမှာ စစ်ဘေးရှောင်ဦးရေ ပိုများလာတယ်လို့ သိရပါတယ်။
