ရွှေဖီမြေ၊ မေလ ၂၁ ရက်၊ ရပ်စောက်
ဓနုပြည်သူ့လွတ်မြောက်ရေးတပ်တော် (DPLA) လှုပ်ရှားနေတဲ့ ရှမ်းတောင် ရပ်စောက်မြို့နယ်၊ ကျောက်ဂူတိုက်နယ်အနီးရှိ ကျေးရွာတွေကို စစ်ကောင်စီတပ်က အဆိပ်ငွေ့ဗုံးကြဲတာနဲ့ လက်နက်ကြီး ပစ်ခတ်တိုက်ခိုက်တာတွေ လုပ်နေတယ်လို့ DPLA က ထုတ်ပြန်ပါတယ်။
မနေ့ မေလ ၂၀ ရက် နေ့လယ် ၁ နာရီဝန်းကျင်နဲ့ ၃ နာရီခွဲဝန်းကျင်မှာ စစ်ကောင်စီတပ်က လွယ်ဟောင်ရွာနဲ့ ဖက်ရင်းကုန်းရွာကြားမှာ အဆိပ်ငွေ့ဗုံး ၅ လုံးနဲ့ လက်နက်ကြီး ၂ လုံး ပစ်ခတ်တိုက်ခိုက်ခဲ့တယ်လို့ ဆိုပါတယ်။
စစ်ကောင်စီတပ်ဟာ နိုင်ငံတကာက ကန့်သတ်တားမြစ်ထားတဲ့ အဆိပ်ငွေ့ဗုံးတွေ အသုံးပြုပြီး စစ်ရာဇဝတ်မှုတွေ မကြာခဏ ကျူးလွန်နေတယ်လို့ ထုတ်ပြန်ထားပါတယ်။
ဒါ့အပြင် TNLA ထိန်းချုပ်ထားတဲ့နယ်မြေတွေမှာလဲ စစ်ကောင်စီတပ်က အရပ်သားတွေကို ပစ်မှတ်ထားပြီး လေကြောင်းတိုက်ခိုက်မှုတွေ ပြုလုပ်နေတာကြောင့် ဒေသခံလူထုတွေအနေနဲ့ လေကြောင်းအန္တရာယ်ကို အထူးဂရုပြုဖို့လည်း တိုက်တွန်းထားပါတယ်။
စစ်ကောင်စီတပ်ဟာ တိုက်ပွဲပြင်းထန်နေတဲ့ နောင်ချိုမြို့နယ် တောင်ခမ်းကျေးရွာဘက်မှာလည်း မကြာခဏဆိုသလို အဆိပ်ငွေ့ဗုံးအသုံးပြုတိုက်ခိုက်တာတွေ ပြုလုပ်နေကြောင်း တအာင်းတပ်ဘက်က ပြောဆိုထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
