မိုင်းအရှိုင်း၊ ဇူလိုင် ၁၃ ရက်၊ ရွှေဖီမြေ
တအာင်းတပ်- TNLA ထိန်းချုပ်ထားတဲ့မြို့တွေဖြစ်တဲ့ နောင်ချို၊ ကျောက်မဲ၊ မိုးကုတ်နဲ့သီပေါမြို့တွေကို ၂ပတ်ကျော်အတွင်း စစ်ကောင်စီတပ်က လေကြောင်းကနေ ဗုံး ၁၄ကြိမ်ထက်မနည်း ဗုံးကြဲတိုက်ခိုက်မှုကြောင့် ၂ ပတ်ကျော်အတွင်း ကလေးနဲ့ အမျိုးသမီးအပါအဝင် ဒေသခံ ၁၅ ဦး သေဆုံးသွားခဲ့ပြီး ၄၆ဦး ထက်မနည်း ထိမှန်ဒဏ်ရာရရှိခဲ့ပါတယ်။
စစ်ကောင်စီတပ်က ပြီးခဲ့တဲ့ ဇွန်လ ၂၄ ရက်ကစပြီး ကျောက်မဲမြို့ က လူစည်ကားရာ စံပြထမင်းဆိုင်ကို စတင်ဗုံးကြဲခဲ့ပြီး အဲဒီတိုက်ခိုက်မှုကြောင့် အမျိုးသမီး ၂ ဦးနဲ့ အမျိုးသား၂ ဦး စုစုပေါင်း ၄ ဦး သေဆုံးသွားကာ ၁၄ ဦးထက်မနည်း ထိမှန်ဒဏ်ရာရရှိခဲ့ပါတယ်။
ဇွန်လ ၂၇ ရက်နေ့ မှာလည်း ကျောက်မဲမြို့ ရက်ကွက် ၇ ရှိ ဆောက်လုပ်ရေးရုံးကို ဦးတည်ပြီး ဗုံးကြဲတိုက်ခိုက်မှု ထပ်မံပြုလုပ်ခဲ့ပြီး အနီးပတ်ဝန်းကျင်မှာနေထိုင်တဲ့ အမျိုးသမီး ၁ ဦး သေဆုံးသွားခဲ့ပြီး ၂ ဦးထိမှန်ဒဏ်ရာရရှိခဲ့ပါတယ်။
အဲဗုံးကြဲတိုက်ခိုက်မှုအပြီး ၂ ရက်အကြာ ဇွန်လ ၂၉ ရက်မှာ ကျောက်မဲမြို့ကို နေ့လည် ၂ နာရီတစ်ကြိမ် ညပိုင်း ၉ နာရီ တစ်ကြိမ် စစ်ကောင်စီတပ်က လေကြောင်းကနေ ဗုံးထပ်ကြဲပြီး နေအိမ်အများအပြား ထိမှန်ပျက်စီသွားခဲ့ပါတယ်။
TNLA ထိန်းချုပ်ထားတဲ့ မိုးကုတ်ကိုလည်း ပြီးခဲတဲ့ ဇွန်လ ၂၆ ရက်မှာ စစ်ကောင်စီတပ်က ဗုံးကြဲတိုက်ခိုက်တာကြောင့် ဒေသခံ ၄ ဦး ထိမှန်ဒဏ်ရာရရှိခဲ့ပါတယ်။
အဲဒီတိုက်မှုအပြီး တစ်ပတ်အကြာ ဇူလိုင် ၈ ရက်မှာတော့ ကျောက်မဲမြို့ငြိမ်းချမ်းရေးကုန်းရှိ ဘိုးဘွားရိပ်သာကို စစ်ကောင်စီတပ်က လေကြောင်းကနေ ထပ်မံဗုံးကြဲပြီး အမျိုးသမီး ၁ ဦး သေဆုံးသွားကာ ၄ ဦး ဒဏ်ရာရရှိခဲ့ပါတယ်။
အဲဇူလိုင် ၈ ရက် မနက်ခင်းပိုင်းမှာပဲ မိုးကုတ်မြို့ကို စစ်ကောင်စီတပ်က ဗုံးကြဲတိုက်ခိုက်ခဲ့ပြီး အဲဒီဗုံးကြဲမှုကြောင့် အမျိုးသမီး ၂ ဦးနဲ့ အမျိုးသား ၁ ဦး သေဆုံးသွားခဲ့သလို ၅ ဦးထိမှန် ဒဏ်ရာရရှိခဲ့ပါတယ်။
အဲဒီဗုံးကြဲတိုက်ခိုက်မှုအပြီး တစ်ရက်အကြာမှာပဲ ဇူလိုင် ၉ ရက် ညပိုင် ၈ နာရီမှာ မိုးကုတ်မြို့ အရှေ့ပိုင်းကို ထပ်မံဗုံးကြဲတိုက်ခိုက်ခဲ့တာကြောင့် ကလေး ၂ ဦး ပွဲချင်းပြီးသေဆုံးသွားကာ ကလေး ၆ ဦးထက်မနည်း ထိမှန်ဒဏ်ရာရရှိခဲ့ပါတယ်။
စစ်ကောင်စီတပ်နဲ့ TNLA တပ်တို့အကြား တိုက်ပွဲပြင်းထန်ရာ နောင်ချိုမြို့နယ် သုံးဆယ်ကျေးရွာကိုလည်း ပြီးခဲ့တဲ့ ဇူလိုင် ၁ ရက်နေမှာ ဗုံး ၁၂ လုံးကြဲချတိုက်ခိုက်လို့ ဒေသခံ အမျိုးသား ၃ ဦး သေဆုံးခဲ့ပြီး ၁ ဦးထိမှန်ဒဏ်ရာရရှိခဲ့ပါတယ်။
ဒါ့အပြင် ဇူလိုင် ၅ရက်နေ့မှာ သီပေါမြို့ကို ဗုံးကြဲခဲ့ပြီး ဇူလိုင် ၁၁ရက်နေ့မှာ ကျောက်မဲနဲ့နောင်ချိုကို ထပ်မံ ဗုံးကြဲခဲ့ပြီး ၁ဦးသေဆုံးပြီး ၅ဦး ဒဏ်ရာရကာ ဒီနေ့ ဇူလိုင် ၁၃ရက်မှာလည်း ကျောက်မဲကို ထပ်မံဗုံးကြဲတိုက်ခိုက်လို့ အဘွားအို ၁ဦး ဒဏ်ရာရခဲ့ပါတယ်။
နောင်ချိုမြို့ကို ပြန်လည်ထိန်းချုပ်နိုင်ဖို့ စစ်ကောင်စီတပ်က အင်အားထောင်ချီသုံးပြီး ရာနဲ့ချီတဲ့ လက်နက်မျိုးစုံနဲ့ ပစ်ခတ်တိုက်ခိုက်နေသလို တိုက်ပွဲဖြစ်ပွားခြင်းမရှိဘဲ TNLA ထိန်းချုပ်ထားတဲ့ ကျောက်မဲနဲ့ မိုးကုတ်မြို့တွေကိုလည်း ဇွန်လ ၂၄ ရက်ကစပြီး လေကြောင်းကနေ ဆက်တိုက်ဗုံးကြဲချတိုက်ခိုက်လာနေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
