မိုင်းရူပ၊ မတ်လ ၂၉ ရက်၊ မိုးဗြဲ
ရှမ်းတောင် ဖယ်ခုံမြို့နယ် မိုးဗြဲမြို့ကို ပြန်ထိန်းချုပ်နိုင်ဖို့ စစ်ကောင်စီတပ်က အင်အား အလုံးအရင်း အသုံးပြုကာ ထိုးစစ်ဆင် တိုက်ခိုက်နေပြီး တိုက်ပွဲ ဆက်လက် ပြင်းထန်နေတယ်လို့ ကရင်နီအမျိုးသားများ ကာကွယ်ရေးတပ်- KNDF က မတ်လ ၂၇ ရက်မှာ ထုတ်ပြန်ထားပါတယ်။
ပြီးခဲ့တဲ့ မတ်လ ၂၄ ရက်မှာ စစ်တပ်ဟာ အင်အားအလုံးအရင်း အသုံးပြုကာ ထိုးစစ်ဆင် တိုက်ခိုက်လာပြီး ကရင်နီ တော်လှန်ရေးအင်အားစုတွေဘက်က ပြန်လည် တိုက်ခိုက်ခဲ့တာကြောင့် စစ်ကောင်စီတပ်ဘက်က ဆုတ်ခွာခဲ့တယ်လို့ ဆိုပါတယ်။
မိုးဗြဲမြို့ထဲ စစ်တပ်က ဒရုန်း၊ လက်နက်ကြီးနဲ့ လေကြောင်း အသုံးပြုပြီး နေ့စဉ် တိုက်ခိုက်နေတာကြောင့် လူနေအိမ် အများစု မီးလောင်ပျက်စီးခဲ့တယ်လို့ ဖော်ပြထားပါတယ်။
မြေပြင်အခြေအနေ သိရှိသူတစ်ဦးကလည်း စစ်တပ်က ထိုးစစ်ဆင် တိုက်ခိုက်နေတာကြောင့် မိုးဗြဲမှာ နေ့စဉ်လိုလို ထိတွေ့တိုက်ပွဲ ဖြစ်ပွားနေပြီး လက်ရှိမှာ မိုးဗြဲမြို့ကို တော်လှန်ရေးတပ်ဘက်က ဆက်လက် ထိန်းချုပ်ထားတယ်လို့ သတင်းရင်းမြစ်တစ်ဦးက ရွှေဖီမြေကို ပြောပါတယ်။
“လောလောဆယ်တော့ တိုက်ပွဲအကြီးတော့ မရှိဘူး။ ပြောက်ကျားစနစ်နဲ့ပဲ တိုက်နေတာ။ မိုးဗြဲမြို့ထဲကို ကျနော်တို့ဘက်ကပဲ ထိန်းချုပ်ထားတယ်”
KNDF ဘက်ကတော့ မိုးဗြဲမှာ နေ့စဉ်လိုလို ထိတွေ့တိုက်ပွဲ ဖြစ်ပွားနေတာကြောင့် လူထုတွေအနေနဲ့ မိုးဗြဲမြို့အနီးမှာ သွားလာတာတွေ မပြုလုပ်ကြဖို့နဲ့ စစ်ရေးသတိ ရှိကြဖို့ တိုက်တွန်းထားပါတယ်။
မိုးဗြဲမြို့ရဲ့ နေရာအများစုကို ကရင်နီ တော်လှန်ရေးအင်အားစုတွေက ထိန်းချုပ်နိုင်ခဲ့ပေမဲ့ မိုးဗြဲမြို့အနီးမှာ စစ်ကောင်စီရဲ့ ခြေမြန်တပ်ရင်း ၄၂၂ ကျန်ရှိနေပါတယ်။
ပြီးခဲ့တဲ့ ၂၀၂၄ ခုနှစ် ဒီဇင်ဘာလကစပြီး ကရင်နီ တော်လှန်ရေးအင်အားစုတွေ ထိန်းချုပ်ထားတဲ့ မိုးဗြဲမြို့ကို စစ်တပ်က အင်အား အလုံးအရင်း အသုံးပြုပြီး ထိုးစစ်ဆင် တိုက်ခိုက်လာတာကြောင့် တိုက်ပွဲ ပြန်လည် ဖြစ်ပွားခဲ့တာ ဖြစ်ပါတယ်။
