မိုင်းရူပ၊ မတ်လ ၁၃ ရက်၊ သပိတ်ကျင်း
မန္တလေးတိုင်း သပိတ်ကျင်းမြို့နယ် တွင်းငယ်ရွာနဲ့ တန်းမြင့်လေ့ကျင့်ရေးကျောင်းအမှတ် ၁၃ တပ်ရှိ စစ်ကောင်စီတပ်ဟာ တအာင်းတပ်မတော်- TNLA နဲ့ ပူးပေါင်းတပ်ရဲ့ ဝိုင်းရံပိတ်ဆို့တာ ခံနေရပြီး လေကြောင်းနဲ့သာ လက်နက်ခဲယမ်း ပို့ဆောင်နေရတယ်လို့ သိရပါတယ်။
မနေ့ မတ်လ ၁၂ ရက်မှာ တွင်းငယ်နဲ့ တကက ၁၃ တပ်ထဲ စစ်တပ်ရဲ့ စစ်ထောက်ပို့လေယာဥ်နဲ့ လက်နက်ခဲယမ်း ၃ ကြိမ် လာရောက် ပို့ဆောင်ပေးခဲ့တယ်လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
“မနေ့ လေယာဥ် လက်နက်ခဲယမ်းတွေကို လာပို့တာ ရှိတယ်။ လေယာဥ်နဲ့ လာပို့တဲ့အချိန်မှာ TNLA ဘက် ပြန်လည် ပစ်ခတ်ခဲ့တာရှိတယ်။ အခုက စစ်ကောင်စီတွေကို TNLA ဘက်က ဝိုင်းရံပိတ်ဆို့ထားဆဲပဲ။ အခု မြေပြင်စစ်ကူလမ်းကြောင်းက ဧရာဝတီမြစ်ကနေပဲ စစ်ကောင်စီတွေ လာလို့ရမယ်”
ဒီနေ့ မတ်လ ၁၃ ရက် မနက်ပိုင်းမှာတော့ စစ်တပ်က TNLA နဲ့ ပူးပေါင်းတပ် တည်ရှိရာသို့ ဒရုန်း အသုံးပြုပြီး ၅ ကြိမ်ထက်မနည်း တိုက်ခိုက်ခဲ့တယ်လို့ သူက ဆက်ပြောပါတယ်။
တွင်းငယ်ရွာကို ပြီးခဲ့တဲ့ ၂၀၂၄ ဩဂုတ်လကတည်းက TNLA နဲ့ ပူးပေါင်းတပ်က တိုက်ခိုက်သိမ်းပိုက်ထားတာဖြစ်ပြီး ၄ လနီးပါးအကြာ ပြီးခဲ့တဲ့ ဒီဇင်ဘာ ၅ ရက်မှာ ပြန်လည် လက်လွှတ်ခဲ့ရတာ ဖြစ်ပါတယ်။
လက်ရှိမှာ တွင်းငယ်ရွာရဲ့ နေရာအားလုံးနီးပါးကို စစ်တပ်က ပြန်လည် ထိန်းချုပ်ထားပြီး TNLA နဲ့ ပူးပေါင်းတပ်ဘက်က တွင်းငယ်ရွာဘေးအထိ တပ်ဆုတ်လိုက်ရပြီး စစ်ကောင်စီတပ်ကို ဝိုင်းရံပိတ်ဆို့ထားတဲ့အခြေအနေ ဖြစ်ပါတယ်။
တွင်းငယ်ရွာကနေ ကချင်ပြည်နယ်ဘက် သွားနိုင်သလို မန္တလေးဘက်လည်း သွားနိုင်တာကြောင့် တွင်းငယ်ရွာဟာ စစ်ရေးအရအရေးပါတဲ့နေရာဖြစ်ပြီး တွင်းငယ်ရွာကို ပြန်ရဖို့ ကြိုးစားနေတာလို့ ရှေ့တန်းစစ်မြေပြင်မှာ ရှိနေသူတွေက ပြောဆိုပါတယ်။
သပိတ်ကျင်းမြို့ကိုတော့ ပြီးခဲ့တဲ့ ဩဂုတ် ၃၀ ရက်မှာ တော်လှန်ရေး အင်အားစုတွေက တိုက်ခိုက်သိမ်းပိုက်နိုင်ခဲ့တာဖြစ်ပြီး စစ်ကောင်စီရဲ့ ၇ မိုင်တပ်စခန်း၊ ကျောက်ကြီးတပ်စခန်းနဲ့ တန်းမြင့်လေ့ကျင်းရေးကျောင်းအမှတ် ၁၃ တပ်တို့ ကျန်ရှိနေတာ ဖြစ်ပါတယ်။
