ရွှေဖီမြေ၊ ဇန်နဝါရီ ၃၁ ရက်
စစ်ကောင်စီက ဒီနေ့မနက် နေပြည်တော်မှာ ကျင်းပပြုလုပ်တဲ့ ကာလုံခေါ် အမျိုးသားကာကွယ်ရေးနဲ့ လုံခြုံရေးေကာင်စီ အစည်းအဝေးမှာ အရေးပေါ်ကာလသက်တမ်းကို နောက်ထပ် ၆ လ တိုးလိုက်တယ်လို့ စစ်ကောင်စီ လက်အောက်ခံ မီဒီယာမှာ ဖော်ပြထားပါတယ်။
စစ်ကောင်စီဟာ လွတ်လပ်ပြီး တရားမျှတတဲ့ ရွေးကောက်ပွဲ ကျင်းပဖို့ တည်ငြိမ်အေးချမ်းမှု လိုအပ်နေတာကြောင့် အရေးပေါ်ကာလ သက်တမ်းကို ထပ်တိုးတာလို့ ဆိုပါတယ်။
၂၀၀၈ ဖွဲ့စည်းပုံအခြေခံဥပဒေအရ အရေးပေါ်ကာလ ပြဋ္ဌာန်းချက်ဆိုင်ရာ ပုဒ်မ ၄၂၁ နဲ့ ၄၂၅ အရ အရေးပေါ်ကာလ သက်တမ်းကို ခြောက်လ နှစ်ကြိမ်သာ တိုးခွင့် ရှိပေမဲ့ စစ်ကောင်စီဟာ အရေးပေါ်ကာလကို အကြိမ်ကြိမ် တိုးနေတာ ဖြစ်ပါတယ်။
ကာလုံ အစည်းအဝေးကို စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်၊ ဒုဗိုလ်ချုပ်မှူးကြီး စိုးဝင်း၊ ကာကွယ်ရေးဝန်ကြီး ဗိုလ်ချုပ်ကြီး မောင်မာင်အေး၊ ပြည်ထဲရေးဝန်ကြီး ဒုဗိုလ်ချုပ်ကြီး ရာပြည့်၊ နိုင်ငံခြားရေးဝန်ကြီး ဦးသန်းဆွေ၊ နယ်စပ်ရေးရာဝန်ကြီး ဒုဗိုလ်ချုပ်ကြီး ထွန်းထွန်းနောင်၊ စစ်ကောင်စီအဖွဲ့ဝင် ဗိုလ်ချုပ်ကြီး အောင်လင်းဒွေး၊ ဗိုလ်ချုပ်ကြီး ရဲဝင်းဦးနဲ့တခြားအရာရှိတွေလည်း တက်ရောက်ခဲ့ပါတယ်။
