မိုင်းရူပ၊ ဖေဖော်ဝါရီ ၁၀ ရက်၊ မိုးကုတ်
တအာင်းတပ်မတော်- PSLF/TNLA ထိန်းချုပ်ထားတဲ့ မိုးကုတ်မြို့ရှိ ကျောက်လုပ်ကွက်တစ်ခုကို စစ်ကောင်စီတပ်က Y-12 လေယာဥ်နဲ့ ဗုံးကြဲတိုက်ခိုက်ခဲ့ရာ သေဆုံးသူ ၄ ဦးနဲ့ ဒဏ်ရာရသူ ၂၀ ကျော် ရှိတယ်လို့ ရွှေဖီမြေက စုံစမ်းသိရှိရပါတယ်။
ဒီနေ့ ဖေဖော်ဝါရီ ၁၀ ရက် မနက်အစောပိုင်း ၁၂ နာရီဝန်းကျင်မှာ မိုးကုတ်အနောက်ပိုင်းရှိ ဝင်းထရံ ကျောက်လုပ်ကွက်ကို Y-12 လေယာဥ်နဲ့ ဗုံး ၂၀ ကျော် ကြဲချတိုက်ခိုက်ခဲ့တာပဲ ဖြစ်ပါတယ်။
“ဗုံးအလုံး ၂၀ ကျော် ရှိမယ် လာကြဲတာ။ သေတဲ့လူ ၄ ယောက် ရှိတယ်လို့ သိရတယ်။ တချို့က ခေါင်းတောင် မရှိတော့ဘူး။ ဒဏ်ရာရတဲ့သူတော့ များတယ်” လို့ မိုးကုတ်မြို့မှာ ရှိနေသူတစ်ဦးက ရွှေဖီမြေကို ပြောပါတယ်။
ထိခိုက်သေဆုံးမှုတွေဟာ ရွှေဖီမြေက ဒီနေ့ မနက်အထိ ရရှိထားတဲ့ အချက်အလက်တွေဖြစ်ပြီး အသေးစိတ်ကို ဆက်လက် စုံစမ်းနေဆဲ ဖြစ်ပါတယ်။
စစ်တပ်ဟာ ကိုးကန့်တပ်- MNDAA နဲ့ အပစ်ရပ်ပြီးနောက်ပိုင်း TNLA ထိန်းချုပ်ထားတဲ့ ဒေသတွေကို ပစ်မှတ်ထား ဗုံးကြဲတိုက်ခိုက်လာနေပါတယ်။
ပြီးခဲ့တဲ့ ဖေဖော်ဝါရီ ၆ ရက်မှာလည်း TNLA ထိန်းချုပ်ထားတဲ့ ရှမ်းမြောက် နောင်ချိုမြို့ကို ဗုံးကြဲတိုက်ခိုက်ခဲ့ရာ အရပ်သားတစ်ဦး ထိခိုက်ဒဏ်ရာ ရခဲ့ပါတယ်။
ဇန်နဝါရီလအတွင်း TNLA ထိန်းချုပ်ထားတဲ့ဒေသတွေမှာ စစ်တပ်ရဲ့ ဗုံးကြဲတိုက်ခိုက်မှုကြောင့် အရပ်သား ၁၃ ဦး သေဆုံးပြီး ၂၆ ဦး ထိခိုက်ဒဏ်ရာ ရခဲ့တယ်လို့ TNLA က ထုတ်ပြန်ထားပါတယ်။
