ရွှေဖီမြေ၊ မေလ ၁၄ ရက်၊ မိုးကုတ်
တအာင်းတပ်- TNLA ထိန်းချုပ်ထားတဲ့ မိုးကုတ်မြို့ကို မနေ့ မေလ ၁၃ ရက် လူတွေအိပ်စက်ချိန် ညသန်းခေါင် ၁၂ နာရီ ဝန်းကျင်မှာ စစ်ကောင်စီတပ်က လေကြောင်းကနေပေါင် ၅၀၀ ဗုံးထပ်ကြဲချ တိုက်ခိုက်ခဲ့တယ်လို့ ဒေသခံတွေက ရွှေဖီမြေကို ပြောပါတယ်။
မိုးကုတ်မြို့အနောက်ပိုင်းနဲ့ အရှေ့ပိုင်းရဲ့ အစပ်မှာရှိတဲ့ ရွှေလိပ်ပြာဟိုတယ်ကို ဦးတည်တိုက်ခိုက်တာဖြစ်ပြီး လူနဲ့နေအိမ်ထိခိုက်မှုတော့မရှိဘူးလို့ သိရပါတယ်။
မိုးကုတ်မြို့ကို မကြဲခင် နာရီပိုင်းမှာလည်း နောင်ချိုမြို့ ဈေးရပ်ကွက် နယ်မြေ ၁၀ ကို ပေါင် ၅၀၀ ဗုံးနဲ့ ကြဲချခဲ့ပြီး နေအိမ် ၇ လုံးထိမှန်ပျက်စီးခဲ့ပါတယ်။
ပြီးခဲ့တဲ့ မေလ ၁၂ ရက်ရဲ့ ညအချိန်မှာလည်း TNLA ထိန်းချုပ်ထားတဲ့ မိုင်းငေါ့မြို့နဲ့ မန်တုံမြို့ကို စစ်ကောင်စီတပ်က ဗုံးကြဲတိုက်ခိုက်ခဲ့ပြီး မန်တုံမြို့ခံ ၁ ဦး သေဆုံးခဲ့ရပါတယ်။
TNLA နဲ့ ကူမင်းမြို့မှာ ဆွေးနွေးခဲ့တဲ့ နောင်ချို၊ ကျောက်မဲ၊ သီပေါ၊ မိုးကုတ်၊ မိုးမိတ် စတဲ့ မြို့ ၅ မြို့ပြန်ပေးရေးကို TNLA ဘက်က လက်မခံခဲ့တာကြောင့် ဆွေးနွေးပွဲ ပျက်ခဲ့ရာ စစ်ကောင်စီတပ်က TNLA ထိန်းချုပ်ထားတဲ့ နေရာတွေကို ဆက်တိုက်ဗုံးကြဲတိုက်ခိုက်နေတာဖြစ်ပါတယ်။
