လွေးလာဝ်ဇာရ်၊ ဇန်နဝါရီ ၂ ရက်၊ တာချီလိတ်
မိုင်းဖုန်းဆရာတော် ဘဒ္ဒန္တဉာဏသံဝရရဲ့ ဝိဇာတ မွေးနေ့ပွဲတော်ကို တအာင်း၊ ကိုးကန့်၊ ကရင်နဲ့ ရခိုင်လူမျိုးတွေကို စစ်ကောင်စီတပ်က ဖြတ်သန်းသွားလာခွင့် မပြုဘူးလို့ စုံစမ်းသိရှိရပါတယ်။
ဆရာတော်ရဲ့ မွေးနေ့ပွဲကို လာမယ့် ဖေဖော်ဝါရီ ၁ ရက်ကနေ ၆ ရက်အထိ ရှမ်းအရှေ့ တာချီလိတ်မြို့နယ်မှာ ကျင်းပသွားမှာ ဖြစ်ပါတယ်။
စစ်တပ်နဲ့ တိုက်ပွဲ ဖြစ်ထားတဲ့ တိုင်းရင်းသားလက်နက်ကိုင်ရဲ့ လူမျိုးတွေကို သံဃာတော်တွေကအစ သံလွင်မြစ်ကူး (တာကော်)တံတားမှာ စစ်ကောင်စီတပ်က ဖြတ်သန်းသွားလာခွင့် မပြုဘူးလို့ ဖြစ်စဉ်သိရှိသူ အမျိုးသားတစ်ဦးက ပြောပါတယ်။
“ပလောင်၊ ကိုးကန့်၊ ကရင်၊ ရခိုင် မှတ်ပုံတင်ကိုင်ထားရင် ဘာထောက်ခံစာပဲ ရှိနေနေ ပေးမဖြတ်ဘူး။ ညှိလို့လည်း မရဘူး။ သွားတဲ့သူရှိရင်လည်း ပြန်လှည့်ခိုင်းတာ”
တာကော်တံတားပေါ် စစ်တပ်ဘက်က လုံခြုံရေးအတွက် ပူးပေါင်းစစ်ဆေးရေးဂိတ် ဖွင့်ထားတယ်လို့လည်း သိရပါတယ်။
ဆရာတော်ရဲ့ မွေးနေ့ပွဲကို သွားရောက် ဖူးမျှော်ကြမယ့် အဲဒီလူမျိုးတွေကို မသွားဖို့နဲ့ သွားလည်း ပြန်လှည့်ခိုင်းမှာ ဖြစ်တဲ့အတွက် မသွားကြဖို့ အထက်ပါ အမျိုးသားက ပြောပါတယ်။
