အလင်း၊ ဇန်နဝါရီလ ၂၄ ရက်၊ ဖလမ်း
ချင်းညီနောင် (CB) အဖွဲ့ ထိန်းချုပ်ထားတဲ့ ချင်းပြည်နယ် ဖလမ်းမြို့နယ်မှာ အင်အား ထမ်မံဖြည့်တင်းလာတဲ့ စစ်ကောင်စီ စစ်ကြောင်းဟာ ဗာလုံရွာနဲ့ ဇောင်ကောင်ရွာမှာ ရောက်ရှိနေပြီလို့ ဒေသခံတွေက ရွှေဖီမြေသို့ ပြောပါတယ်။
“ကလေး-သိုင်းငင်း ကားလမ်းအတိုင်း သိုင်းငင်းရွာကို ရောက်လာပြီး သိုင်းငင်းရွာကနေ သိုင်းငင်း-ဖလမ်း ကားလမ်းအတိုင်း ဖလမ်းဘက် အင်အားဖြည့်တာပါ။ ရှေ့ပြေး စစ်သားတွေ ဗာလုံကို ရောက်ပြီ။ ကားတွေက ဇောင်ကောင်ဘက် ရောက်ပါပြီ” လို့ ဖလမ်းဒေသခံတစ်ဦးက ရွှေဖီမြေသို့ ပြောပါတယ်။
စစ်ကောင်စီဟာ စစ်ကားတွေနဲ့ အင်အား ၃၀၀ ဝန်းကျင်ခန့် ဖလမ်းမြို့နယ်ကို အင်အားဖြည့်တင်းလာတာကြောင့် တိုက်ပွဲ ပိုပြင်းထန်လာနိုင်တယ်လို့ သိရပါတယ်။
“အင်အားက ၃၀၀ လောက်ရှိမယ် ခန့်မှန်းတယ်။ စစ်ကား ၃ စီး၊ ၄ စီးလောက် ပါတယ်။ လက်နက်ခဲယမ်းတွေကလည်း သယ်ဆောင် လာနိုင်တဲ့အတွက် တိုက်ပွဲက ပိုပြင်းထန်လာမယ် ထင်တယ်။ ခြေချင်တစ်ဝက်၊ ကားတစ်ဝက်နဲ့ စစ်ကြောင်း ထိုးတာပါ” လို့ အထက်ပါ ဖလမ်းဒေသခံတစ်ဦးက ရွှေဖီမြေသို့ ပြောပါတယ်။
လက်ရှိ အဲဒီစစ်ကောင်စီ စစ်ကြောင်းနဲ့ ချင်းတော်လှန်ရေးတပ်တွေနဲ့ ထိတွေ့တိုက်ပွဲတွေ မရှိသေးသလို စစ်ကြောင်းဟာ ဖလမ်းမြို့နယ်မှာရှိတဲ့ စစ်ကောင်စီထံလည်း မရောက်သေးဘဲ လမ်းတစ်ဝက်မှာ ရှိနေသေးတယ်လို့ သိရပါတယ်။
စစ်ကောင်စီက ဖလမ်းမြို့နယ် ပြန်ရရေးအတွက် ကလေးမြို့ကနေ ပြီးခဲ့တဲ့ ၂၀၂၅ ခုနှစ်၊ အောက်တိုဘာလကစပြီး စစ်ကြောင်း နှစ်ကြောင်းနဲ့ ထိုးစစ်ဆင်နေတာ ဖြစ်ပါတယ်။
အဲဒီစစ်ကြောင်းနဲ့ ချင်းတော်လှန်ရေးပူးပေါင်းအဖွဲ့တို့ ထိတွေ့တိုက်ပွဲဖြစ်ပွားပြီး စစ်ကောင်စီတပ်ဘက်က ထိခိုက်သေဆုံးမှုများကာ အခုအခါ အင်အားထပ်ပံ ဖြည့်တင်းလာတာပါ။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
