ပျားကြီး၊ ဇန်နဝါရီ ၁၂ ရက်၊ မတ္တရာ
မန္တလေးတိုင်း မတ္တရာမြို့နယ်ထဲက ကျေးရွာတချို့ကို စစ်ကောင်စီတပ်က သိန်း ရာနဲ့ချီ တောင်းယူပြီး ပျူစောထီးတွေကိုလေလံတင် ရောင်းချနေတယ်လို့ ဒေသခံနဲ့ တပ်သတင်းရင်းမြစ်တွေက ပြောပါတယ်။
လေကြောင်း တိုက်ခိုက်မှုနဲ့ လက်နက်ကြီးပစ်ခတ်မှုကြောင့် ဘေးလွတ်ရာ ထွက်ပြေးနေရတဲ့ ကျေးရွာခံရဲ့ ပစ္စည်းအားလုံးကို ယူဆောင်ခွင့် ပေးထားပြီး ပစ္စည်းသယ်ယူပြီးစီးတဲ့ နေအိမ်တွေကိုတော့ တစ်အိမ်ချင်းမီးရှို့ဖျက်ဆီးပစ်နေတာ ဖြစ်ပါတယ်။
“ပျူတွေထဲက ပိုက်ဆံရှိတဲ့ ကောင်တွေက လေလံ ယူတာပေါ့။ ပြီးရင် ကြိုက်တာကို ကြိုက်သလို ယူခွင့် ပေးထားတယ်။ အကုန်လုံး ယူပြီးရင် တစ်ခါတည်း မီးရှို့ပေါ့။ အရင်လို ရွာလုံးကျွတ် မရှို့တော့ဘူး။ အမှိုက်ထဲက ရွှေထုတ်တယ်လို့ ခေါ်ကြတယ်။ ပစ္စည်း ယူပြီးတဲ့အိမ်ကိုပဲ ရှို့တာ” လို့ ဒေသခံတစ်ဦးက ပြောပါတယ်။
စစ်တပ်က လေလံ တင်ထားတဲ့ ကျေးရွာပေါင်း ၁၀ ရွာထက်မနည်း ရှိနေပြီး ဒေသခံရဲ့ စီးပွားရေးအခြေအနေနဲ့ ရွာအကြီး အသေးပေါ် မူတည်ပြီးတော့ တစ်ရွာကို အနည်းဆုံး သိန်း ၂၅၀ ကနေ သိန်း ၄၀၀ အထိ တောင်းယူနေတယ်လို့ ဒေသခံတွေက ဆိုပါတယ်။
“လေလံ ဆွဲချင်တဲ့ ပျူတွေက အများကြီးပဲ။ ပထမဆုံးတစ်ရွာမှာ လေလံဆွဲတဲ့ကောင်က သိန်းထောင်ချီ ရလိုက်တာ။ အခု အနောက်ပိုင်းက ရွာတွေဘက် ဝင်နေကြတယ်” လို့ လုံခြုံရေးအရ နာမည်နဲ့ရာထူးကို မဖော်လိုတဲ့ တပ်သတင်းရင်းမြစ်တစ်ဦးက ပြောပါတယ်။
လက်ရှိအချိန်မှာ ငါးလုံးပြွန်၊ သပြေပင်ကုန်း၊ လက္ကောင်းကြီး၊ လက္ကောင်းလေး၊ မြွေဥဒိန် စတဲ့ကျေးရွာကို လေလံ ပေးထားပြီး မြွေဥဒိန်ရွာကို ၁၂ ရက်ဆက်တိုက် နေအိမ် မီးရှို့ဖျက်ဆီးနေတယ်လို့ ဒေသခံတွေက ပြောဆိုပါတယ်။
