မိုင်းရူပ၊ ဇန်နဝါရီ ၈ ရက်၊ မိုးကုတ်
တအာင်းတပ်မတော်- TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့ကို စစ်ကောင်စီတပ်က Y-12 လေယာဥ်နဲ့ ဗုံးအလုံး ၂၀ ကျော် ကြဲချတိုက်ခိုက်ခဲ့တယ်လို့ ရွှေဖီမြေက စုံစမ်းသိရှိရပါတယ်။
ဒီနေ့ ဇန်နဝါရီ ၈ ရက် နေ့လယ် ၁ နာရီဝန်းကျင်မှာ မိုးကုတ်အရှေ့ပိုင်းရှိ ဂေါက်ကွင်းအနီးတစ်ဝိုက်မှာ ဗုံးကြဲချတိုက်ခိုက်ခဲ့တာပဲ ဖြစ်ပါတယ်။
“နေ့လယ် တစ်နာရီဝန်းကျင်မှာ Y-12 နဲ့ ဗုံး ငါးကြိမ် အလုံး နှစ်ဆယ်ကျော် ကြဲချတာ။ ဂေါက်ကွင်းတစ်ကြောမှာ ကျတာ။ ထိခိုက်မှုတော့ မသိရသေးဘူး” လို့ မိုးကုတ်ဒေသခံတစ်ဦးက ရွှေဖီမြေကို ပြောပါတယ်။
ဗုံးကြဲတိုက်ခိုက်မှုကြောင့် ထိခိုက်သေဆုံးမှု အခြေအနေကိုတော့ ရွှေဖီမြေက ဆက်လက်စုံစမ်းနေဆဲ ဖြစ်ပါတယ်။
မိုးကုတ်အရှေ့ပိုင်းရှိ ဂေါက်ကွင်းမှာ TNLA က ကျောက် တူးဖော်နေတယ်ဆိုပြီး စစ်ကောင်စီကို ထောက်ခံတဲ့ တယ်လီဂရမ် ချန်နယ်တွေမှာ မကြာခဏ စွပ်စွဲပြီး ရေးသားဖော်ပြနေကြတာကို တွေ့ရပါတယ်။
PSLF/TNLA ရဲ့ ပြောရေးဆိုခွင့်ရှိသူ လွေးယေဦးကတော့ ဂေါက်ကွင်းမှာ TNLA က ရွှေတူးဖော်တာ မရှိကြောင်း ရွှေဖီမြေကို ပြောဆိုထားပါတယ်။
ပြီးခဲ့တဲ့ ၂၀၂၄ ခုနှစ် နိုဝင်ဘာ ၁၁ ရက်မှာလည်း မိုးကုတ်မြို့ကို စစ်တပ်က လေယာဥ်နဲ့ ဗုံးကြဲတိုက်ခိုက်ခဲ့တာကြောင့် သေဆုံးသူနဲ့ ဒဏ်ရာရသူ ၂၀ ကျော် ရှိခဲ့ပါတယ်။
မိုးကုတ်မြို့ကို ၂၀၂၄ ခုနှစ် ဇူလိုင် ၂၅ ရက် ၁၀၂၇ စစ်ဆင်ရေး ဒုတိယလှိုင်းအတွင်း TNLA နဲ့ ပူးပေါင်းတပ်က တိုက်ခိုက်သိမ်းပိုက်နိုင်ခဲ့တာပဲ ဖြစ်ပါတယ်။
