ပျားကြီး၊ ဖေဖော်ဝါရီ ၂၅၊ မြိုင်
မကွေးတိုင်း၊ မြိုင်မြို့နယ်၊ ဆုံကုန်းကျေးရွာက ဘုန်းတော်ကြီးကျောင်းကို စစ်ကောင်စီကလေကြောင်းတိုက်ခိုက်မှုပြုလုပ်ခဲ့တာကြောင့် သေဆုံးသူ လူပေါင်း ၂၀ ကျော် ရှိလာခဲ့ပြီလို့ ဒေသခံတွေက ပြောပါတယ်။
ကျောက်ခွက်ရေနံမှော်ဒေသအတွင်းမှာရှိတဲ့ ဆုံကုန်းကျေးရွာ ဘုန်းတော်ကြီးကျောင်းမှာ ဒီကနေ့ မနက်ပိုင်းက မင်္ဂလာပွဲပြုလုပ်နေချိန် လေကြောင်းတိုက်ခိုက်မှုပြုလုပ်ခဲ့တာဖြစ်ပါတယ်။
“ကျောင်းပေါ်ကိုတည့်တည့်ကျတာ။ အလောင်းတွေကပြန့်ကြဲနေတာဆိုတော့ မနည်းကြီးကိုဆွဲထုတ်နေရတာ။ တိတိကျကျကိုမသိရသေးဘူး။ ၂၀ ကျော်လောက်ရှိသွားပြီ။ ဒဏ်ရာရတဲ့သူတွေလည်းမနည်းဘူး”လို့ ဒေသခံအမျိုးသားတစ်ဦးကပြောပါတယ်။
လက်ရှိအချိန်မှာ ဒေသတွင်းတော်လှန်ရေးတပ်ဖွဲ့တွေက နောက်တစ်ကြိမ်လေကြောင်းအန္တရာယ်ရှိလာနိုင်တဲ့အတွက် ဒေသခံတွေကို ဘေးလွတ်ရာထွက်ပြေးတိမ်းရှောင်မှုတွေပြုလုပ်ဖို့သတိပေးထားတယ်လို့ဒေသခံတွေက ဆိုပါတယ်။
မြိုင်ပြည်သူ့ကာကွယ်ရေးတပ်ဖွဲ့ ပြန်ကြားရေး တာဝန်ခံ ကိုသုတက “ပေါင် ၅၀၀ နှစ်လုံးနဲ့ ကြဲပြီးတဲ့နောက်မှာ ၁၀ နာရီကျော်လောက်မှာ နောက်ထပ် မိတ္ထီလာတပ်က ဂျက်ဖိုက်တာတစ်စီးနဲ့ ၃၀ မမဗုံးသီး အလုံး ၆၀ လောက်ကြဲချတယ်။ အထိခိုက်ကတော့ ၂၀ ပတ်ချာလည်လောက် ရှိမယ်။ အတိကျတော့မပြောနိုင်သေးဘူး အခုမှရှင်းလင်းရေးလုပ်နေတော့” ဆိုပြီး ရွှေဖီမြေကို ပြောပါတယ်။
မနေ့ကညပိုင်းမှာလည်း ပေါက်မြို့နယ်၊ ကင်းမကျေးရွာကို စစ်ကောင်စီက စက်တပ်လေထီး ( Paramoter) နဲ့ ဗုံးကြဲတိုက်ခိုက်ခဲ့တာကြောင့် အသက် ၁၇ နှစ်အရွယ် ကျောင်းသူတစ်ဦးအပါအဝင် အမျိုးသမီး ၃ ဦးသေဆုံးခဲ့ပြီး အသက် ၁၃ နှစ်အရွယ် ကျောင်းသားတစ်ဦးခြေထောက်ပြတ်ဒဏ်ရာရရှိခဲ့တယ်လို့ သိရပါတယ်။
