လွေးလာဝ်ဇာရ်၊ နိုဝင်ဘာ ၁၁ ရက်၊ ကန့်ဘလူ
စစ်ကိုင်းတိုင်း ကန့်ဘလူမြို့နယ် ကျီကျင်းရွာက ဒေသခံရဲ့ နေအိမ်တွေကို စစ်ကောင်စီတပ်နဲ့ ပျူစောထီးအဖွဲ့က မီးရှို့ဖျက်ဆီးခဲ့တယ်လို့ ကျွန်းလှ တက်ကြွလှုပ်ရှားသူများအဖွဲ့က မနေ့ နိုဝင်ဘာ ၁၀ ရက်မှာ ထုတ်ပြန်ထားပါတယ်။
ကျီကျင်းရွာထဲ အထိုင်ချတပ်စွဲထားတဲ့ စစ်တပ်နဲ့ ပျူစောထီးအဖွဲ့ မနေ့က မီးရှို့ဖျက်ဆီးခဲ့တယ်လို့ ဆိုပါတယ်။
ကျွန်းလှ တက်ကြွလှုပ်ရှားသူများအဖွဲ့မှ တာဝန်ရှိသူတစ်ဦးက “အဲရွာမှာ စကစတွေ ထိုင်ထားတာ သုံးလလောက် ရှိနေပြီဗျ။ ရွာထဲမှာရှိတဲ့ စကစတွေကပဲ မီးရှို့တာပါ” လို့ ပြောပါတယ်။
ကျီကျင်းရွာထဲ စစ်တပ်က တပ်စွဲနေဆဲ ဖြစ်တာကြောင့် မီးရှို့ဖျက်ဆီးခံရတဲ့ နေအိမ် အရေအတွက်ကိုတော့ အတည်မပြုနိုင်သေးဘူးလို့ သိရပါတယ်။
လက်ရှိအချိန်ထိ စစ်တပ်ရဲ့ စစ်ကြောင်းဟာ ကန့်ဘလူမြို့နယ်အတွင်းက ကျေးရွာတွေမှာ လှည့်လည်သွားလာနေဆဲ ဖြစ်တယ်လို့ ဆိုပါတယ်။
ပြီးခဲ့တဲ့ အောက်တိုဘာ ၉ ရက်တုန်းကလည်း ကန့်ဘလူမြို့နယ် ဇီးကုန်းသကြားစက်ကနေ ထွက်လာတဲ့ စစ်တပ်နဲ့ ပျူစောထီးအဖွဲ့ဟာ ထန်းတပင်ရွာထဲ ဝင်ရောက်ပြီး ဒေသခံရဲ့ နေအိမ်တွေကို မီးရှို့ဖျက်ဆီးခဲ့ပါတယ်။
ပြီးခဲ့တဲ့ အောက်တိုဘာလအတွင်း အရပ်သား ၈၀ ဦးကို ပေါ်တာဆွဲ ဖမ်းဆီးခဲ့တဲ့အပြင် အမျိုးသမီး ၂ ဦးကိုလည်း အဓမ္မပြုကျင့် သတ်ဖြတ်ခဲ့ပြီး နောက်ထပ် ၂ ဦးက ပျောက်ဆုံးနေဆဲ ဖြစ်တယ်လို့ ကျွန်းလှ တက်ကြွလှုပ်ရှားသူများအဖွဲ့က ပြီးခဲ့တဲ့ အောက်တိုဘာ ၃၁ ရက်မှာ ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
