မြတ်နိုး၊ မေ ၃၁ ရက်
ဧရာဝတီမြစ်ရဲ့ မြစ်ဖျားပိုင်းဖြစ်တဲ့ မေခမြစ်ဟာ ဒီနေ့ မေလ ၃၁ ရက်နေ့မှာ ရေပိုကြီးလာလို့ ချီဖွေစစ်ရှောင်ရာနေရာတွေမှာလည်း ရေမြှုပ်လာတာအပြင် ဧရာဝတီမြစ်ပါ ရေတက်လာနေကြောင်း ဒေသခံတွေဆီက သိရပါတယ်။
၁၀ ပေခန့် ရေမြင့်တက်လာတာဖြစ်ပြီး စစ်ရှောင်တွေကတော့ ရေဘေးလွတ်ရာကို ပြောင်းရွှေ့နေကြတယ်လို့ ဒေသခံတစ်ဦးက ပြောပါတယ်။
“မေခမြစ် ရေကြီးလာလို့ မေလ ၃၁ ရက်နေ့ ညနေ ၃ နာရီ ဝန်းကျင်ခန့်ကစ ချီဖွေရှိ စစ်ရှောင်စခန်း ရေမြုပ်စပြုလာပါပြီ” လို့ ဒေသခံတစ်ဦးက ပြောပါတယ်။
လက်ရှိမှာ မေခမြစ်ရေ ကြီးပြီး စိုးရိမ်စရာ အခြေအနေမဟုတ်ပေမယ့် မြစ်ကြီးနားက မြေနိမ့်ပိုင်းမှာ နေထိုင်သူတွေ ပြင်ဆင်ထားသင့်တယ်လို့ သူက ပြောပါတယ်။
“အခြေအနေကတော့ အိမ်ပါ မျောပါလာပြီ။ မြစ်ရေ တော်တော်ပြန်တက်နေတယ်။ ဒီရက်ပိုင်း မိုး ဆက်တိုက် ဆက်တိုက်ရွာတာနဲ့ မြစ်ရေတွေ ကြီးနေတာ။ ဧရာဝတီမြစ် အရမ်းမကြီးဘူး ဆိုပေမယ့် အရင်ကထက်စာရင်ရေကြီးတယ်။ ရေလယ်ကျွန်းတွေတောင် မြုပ်သွားပြီ။” လို့ မြစ်ကြီးနား ဒေသခံတစ်ဦးက ပြောပါတယ်။
နေရာအနှံ့ အပြားမှာ မိုးထစ်ချုန်းရွာနိုင်ပြီး တချို့ဒေသတွေမှာ နေရာကွက်ကြား မိုးကြီးကြောင်း မိုးလေဝသနဲ့ ဇလဗေဒဦးစီးဌာနက ဒီနေ့ မေလ ၃၁ ရက်နေ့ ညနေ ၄ နာရီမှာ အသိပေး သတင်းထုတ်ပြန်ထားပါတယ်။
မိုးသည်းထန်စွာ ရွာသွန်းခြင်းနဲ့အတူ လေပြင်းတိုက်၊ မိုးထစ်ချုန်း၊ မိုးကြိုးပစ်၊ လျှပ်စီးလက်၊ မိုးသီးကြွေ၊ လျှပ်တပြက်ရေကြီး၊ မြေပြိုတာတွေ ဖြစ်ပေါ်နိုင်လို့ ကုန်းမြင့်ဒေသမှာ နေထိုင်သူတွေအနေနဲ့ မြေပြိုမှု အန္တရာယ်နဲ့ မြစ်၊ ချောင်းအနီးတွေမှာ နေထိုင်သူတွေ ရေကြီး၊ ရေလျှံမှုအန္တရာယ် ကြုံလာရနိုင်တာကြောင့် ကြိုတင်ရှောင်ရှားနိုင်ရန်လည်း အကြံပြုထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
