မိုင်းရူပ၊ မတ်လ ၁၃ ရက်၊ ကျင်စန်းကျော့
ညီနောင်မဟာမိတ် ၃ ဖွဲ့ဖြစ်တဲ့ တအာင်းတပ်- TNLA၊ ကိုးကန့်တပ်- MNDAA နဲ့ အာရက္ခတပ်တော်- AA ထိန်းချုပ်ထားတဲ့ ကျင်စန်းကျော့နယ်စပ်ဂိတ်မှာ စက်ပစ္စည်းကလွှဲပြီး ကျန်ကုန်ပစ္စည်းတွေကို တရုတ်ဘက်က သယ်ယူခွင့် ပြုပေးနေပြီလို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ မတ်လ ၃ ရက်ကစပြီး တရုတ်-မြန်မာနယ်စပ် မူဆယ် ၁၀၅ မိုင် ကျင်စန်းကျော့နယ်စပ်ဂိတ်မှာ တရုတ်နိုင်ငံကနေ မြန်မာဘက် ကုန်ပစ္စည်း သယ်ယူခွင့် ပြုပေးတာဖြစ်ပြီး စက်ပစ္စည်းတွေကိုတော့ သယ်ယူခွင့် မပေးသေးဘူးလို့ နယ်စပ်ဂိတ်အကြောင်း သိရှိထားသူ ၁၀၅ မိုင်ဒေသခံတစ်ဦးက ရွှေဖီမြေကို ပြောပါတယ်။
“စက်ပစ္စည်းကလွှဲရင် ကုန်ကတော့ ပေးထွက်ပြီပေါ့။ စက်ပစ္စည်း အကြီးစားတွေ ပေးမထွက်ဘူး။ ဥပမာ လက်ဖက်လှော်စက်တို့ ပါတာပေါ့။ တရုတ်ဘက်က သယ်ယူခွင့်ပြုပေမဲ့ အခွန်စျေးနှုန်းတော့ နည်းနည်းများတယ်”
တရုတ်ဘက်က ကုန်ပစ္စည်း သယ်ယူခွင့် ပြုပေမဲ့ ညီနောင်မဟာမိတ် ၃ ဖွဲ့ဘက်က ကောက်ခံတဲ့ အခွန်တွေ များတာကြောင့် ကုန်သည်အနည်းစုလောက်သာ ကုန်ပစ္စည်း ကုန်သွယ်မှု ပြုလုပ်နေသေးတယ်လို့ သူကဆက်ပြောပါတယ်။
ကျင်စန်းကျော့ဂိတ်ဟာ ၁၀၂၇ စစ်ဆင်ရေး ပထမလှိုင်းကတည်း တရုတ်ဘက်က ပိတ်ထားတာဖြစ်ပြီး ပြီးခဲ့တဲ့ နိုဝင်ဘာ ၂၁ ရက်ကစကာ မြန်မာဘက်ကနေ တရုတ်ဘက် ကြံ၊ ပြောင်းဖူးနဲ့ မီးသွေးကို တရုတ်က တင်သွင်းခွင့် ပြုရာကနေ လက်ရှိမှာ တရုတ်ဘက်ကနေ မြန်မာဘက် ကုန်ပစ္စည်း သယ်ယူခွင့် ပြန်လည် ခွင့်ပြုခဲ့တာ ဖြစ်ပါတယ်။
ကျင်စန်းကျော့ဂိတ်ဟာ ၁၀၂၇ စစ်ဆင်ရေး ပထမလှိုင်းအတွင်း ညီနောင်မဟာမိတ် ၃ ဖွဲ့ တိုက်ခိုက်သိမ်းပိုက်ထားပြီး ထိန်းချုပ်ထားတာ ဖြစ်ပါတယ်။
နယ်စပ်ဂိတ်တွေ ပြန်လည် ဖွင့်လှစ်ခဲ့တာနဲ့ ပတ်သက်ပြီး ညီနောင်မဟာမိတ် ၃ ဖွဲ့ကတော့ တရားဝင် ထုတ်ပြန်ထားတာ မရှိသေးပါဘူး။
