မိုင်းအရှိုင်း၊ ဧပြီ ၁၈ ရက်၊ သီပေါ
ဒီနေ့ ဧပြီ ၁၈ ရက် မနက်ပိုင်းမှာ သီပေါကနေ လားရှိုးဘက် တက်လာတဲ့ လမ်းမကြီးကို ကိုးကန့်တပ်- MNDAA က ပိတ်ထားပြီး သီပေါကနေ ကျောက်မဲဘက် အဝင်အထွက်ကိုလည်း တအာင်းတပ်- TNLA က ယာယီ ပိတ်ခဲ့တယ်လို့ ရွှေဖီမြေက စုံစမ်းသိရှိရပါတယ်။
လက်ရှိ သတင်းရေးသားနေတဲ့ မနက် ၁၁ နာရီထိ TNLA က သီပေါ-ကျောက်မဲလမ်းကို ပြန်ဖွင့်ပေးပြီဖြစ်ပေမဲ့ လားရှိုး-သီပေါလမ်းကိုတော့ ကိုးကန့်တပ်က ဆက်လက်ပိတ်ထားဆဲ ဖြစ်ပါတယ်။
“ကိုးကန့်တွေက သီပေါတံတားကနေ စပိတ်တာ။ ဘယ်သူမှ ဖြတ်လို့မရဘူး။ ဘုန်းကြီးတောင် ပေးမဖြတ်ဘူး။ ဘာလို့ပိတ်လဲ အကြောင်းအရင်းတော့ မပြောပြဘူး” လို့ ဒေသခံတစ်ဦးက ပြောပါတယ်။
ဒီနေ့မှာ စစ်ကောင်စီက လာရှိုးမြို့ထဲ ဝင်ရောက်လာနေပြီဖြစ်တယ်လို့ ဒေသခံတွေက ပြောဆိုပေမဲ့ ရွှေဖီမြေအနေနဲ့ သီးခြားအတည်မပြုနိုင်သေးပါဘူး။
တရုတ်ရဲ့ ကြားဝင်စေ့စပ်မှုနဲ့ စစ်ကောင်စီနဲ့ MNDAA အကြား အပစ်ရပ်ဖို့ သဘောတူခဲ့ပြီးနောက် ကိုးကန့်တပ်ဟာ ဧပြီ ၂၁ ရက်နောက်ဆုံးထားကာ လားရှိုးမြို့ကနေ ထွက်ခွာရမှာဖြစ်ပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက် လည်ပတ်မှာ ဖြစ်ကြောင်း သတင်းထွက်နေတာ ဖြစ်ပါတယ်။
