လွေးဇွန်မိုး၊ ဇန်နဝါရီ ၁ ရက်၊ ဘားအံ
မွန်ပြည်နယ် သထုံခရိုင်နဲ့ ကရင်ပြည်နယ် ဖာပွန်ခရိုင်မှာ ပြုလုပ်ခဲ့တဲ့ ကရင်နှစ်သစ်ကူးပွဲတော်ကို စစ်ကောင်စီတပ်က ဗုံးကြဲတိုက်ခိုက်ခဲ့ကြောင်း ကရင်အမျိုးသား အစည်းအရုံး- KNU က မနေ့ ဒီဇင်ဘာ ၃၁ ရက်မှာ ထုတ်ပြန်ထားပါတယ်။
ပြီးခဲ့တဲ့ ဒီဇင်ဘာ ၃၀ ရက်မှာ KNU ထိန်းချုပ်နယ်မြေ ဒူသထူးခယ(သထုံ)ခရိုင်အတွင်းက ယိုးကလား၊ ထီးဖဒိုထာကြားနဲ့ မူတြော် (ဖာပွန်)ခရိုင်ထဲက နိုဖောထီးရွာမှာ ပြုလုပ်တဲ့ ကရင်နှစ်သစ်ကူးပွဲတော်အပြီးမှာ ပွဲကျင်းပရာနေရာကို ဗုံးကြဲတိုက်ခိုက်ခဲ့တာ ဖြစ်ပါတယ်။
KNU ရဲ့ ပြောရေးဆိုခွင့်ရှိသူ ပဒိုစောကလယ်စေးက “ကရင်နှစ်သစ်ကူးနေ့ဆိုတာက ကရင်တစ်မျိုးသားလုံးနဲ့ ဆိုင်တာပေါ့နော်။ တော်လှန်ရေး လုပ်နေတဲ့ ကရင်တွေ ရှိသလို တော်လှန်ရေးထဲမှာ မပါဝင်တဲ့ ကရင်တွေလည်း ရှိပါတယ်။ အဲဒါကတော့ ဘယ်လိုပဲဖြစ်ဖြစ်ပေါ့နော်။ ကရင်တစ်မျိုးသားလုံးကို စော်ကားတိုက်ခိုက်တယ်လို့ပဲ ကျနော်တို့ မြင်ပါတယ်ခင်ဗျ” လို့ ပြောပါတယ်။
စစ်တပ်ဟာ တိုင်းရင်းသား လက်နက်ကိုင်တွေကို တွေ့ဆုံဆွေးနွေးဖို့ မကြာခဏ ဖိတ်ခေါ်နေပေမဲ့ ၎င်းတို့ရဲ့လုပ်ရပ်က တွေ့ဆုံဆွေးနွေးပွဲနဲ့ ဆန့်ကျင်နေတယ်လို့ ပဒိုစောကလယ်စေးက ပြောပါတယ်။
ဒါ့အပြင် ကရင်လူမျိုးတွေ အထွဋ်အမြတ်ထားတဲ့ ကရင်နှစ်သစ်ကူးပွဲတော်ကို ဂုဏ်သိက္ခာ ညိုးနွမ်းစေပြီး ပွဲတက်ရောက်သူတွေကို သေကြေပျက်စီးစေချင်တဲ့ ရည်ရွယ်ချက်နဲ့ ဗုံးကြဲတိုက်ခိုက်ခဲ့တဲ့ စစ်တပ်ရဲ့ လုပ်ရပ်ကို ရှုတ်ချတယ်လို့လည်း ဆိုပါတယ်။
