မိုင်းရူပ၊ ဖေဖော်ဝါရီ ၂၅ ရက်၊ ဖယ်ခုံ
ရှမ်းတောင် ဖယ်ခုံမြို့နယ် ဗိုးဗြဲမြို့တိုက်ပွဲမှာ စစ်ကောင်စီတပ်ဘက်က အဆိပ်ငွေဗုံး အသုံးပြုတိုက်ခိုက်နေတာရှိကြောင်း ကရင်နီအမျိုးသားများကာကွယ်ရေးတပ်- KNDF ရဲ့ ဗဟိုသတင်းနဲ့ ပြန်ကြားရေးတာဝန်ခံက ရွှေဖီမြေကို ပြောပါတယ်။
လက်ရှိမှာ မိုးဗြဲမြိုကို ကရင်နီတော်လှန်ရေးအင်အားစုတွေက ဆက်လက်ထိန်းချုပ်ထားပြီး စစ်ကောင်စီတပ်ဘက်က လက်နက်ကြီး၊ ဒရုန်းနဲ့ လေကြောင်းတိုက်ခိုက်မှုတွေ ဆက်လက်လုပ်ဆောင်နေတယ်လို့ ဆိုပါတယ်။
“စစ်ကောင်စီဘက်က အဆိပ်ငွေ့ဗုံးလို့ ယူဆရတဲ့ အငွေ့တွေကို ထပ်ပြီးလာကြဲတာ ရှိတယ်။ ရှေ့တန်းရဲဘော်တွေကတော့ပြီးခဲ့တဲ့ ဒီဇင်ဘာလတုန်းက လိုမျိုးအဆိပ်ငွေ့ကို ရှူမိသလိုမျိုး အဲဝေဒနာ ပြန်ခံစားရတာ ရှိတယ်” လို့ KNDF ရဲ့ ဗဟိုသတင်းနဲ့ ပြန်ကြားရေးတာဝန်ခံက ရွှေဖီမြေကို ပြောပါတယ်။
ပြီးခဲ့တဲ့ ဒီဇင်ဘာ ၇ ရက်နဲ့ ၈ ရက်မှာ မိုးဗြဲမြို့အခြေစိုက် စစ်ကောင်စီရဲ့ ခြေမြန်တပ်ရင်း-၄၂၂ တပ်စခန်းမှ မိုးဗြဲမြို့နဲ့ အနီးတဝိုက်တွေမှာ ဒရုန်းနဲ့ ဗုံးကြဲတိုက်ခိုက်ခဲ့ရာ အက်စ်ဖော့စ်တံဆိပ်ပါ ၅၆၀ အဆိပ်ငွေ့ပြားကို အသုံးပြုပြီး တိုက်ခိုက်ခဲ့တယ်လို့ KNDF က ထုတ်ပြန်ထားပါတယ်။
မိုးဗြဲမြို့ရဲ့ နေရာအများစုကို ကရင်နီတော်လှန်ရေးအင်အားစုတွေက ထိန်းချုပ်နိုင်ခဲ့ပေမယ့် မိုးဗြဲမြို့အနီးမှာ စစ်ကောင်စီရဲ့ ခြေမြန်တပ်ရင်း-၄၂၂ ကျန်ရှိနေတာဖြစ်ပါတယ်။
ပြီးခဲ့တဲ့ ဇန်နဝါရီလကစပြီး ကရင်နီတော်လှန်ရေးအင်အားစုတွေကထိန်းချုပ်ထားတဲ့ မိုးဗြဲမြို့ကို စစ်ကောင်စီ က အင်အားအလုံးအရင်းအသုံးပြုပြီး ထိုးစစ်ဆင် တိုက်ခိုက်လာတာကြောင့် တိုက်ပွဲတွေ ပြန်လည်ဖြစ်ပွားခဲ့တာ ဖြစ်ပါတယ်။
ညီနောင်မဟာမိတ် ၃ ဖွဲ့ရဲ့ ၁၀၂၇ စစ်ဆင်ရေးစတင်ပြီးနောက် စစ်ရေးမှာ အရေးနိမ့်နေတဲ့ စစ်ကောင်စီတပ်ဟာ တိုက်ပွဲတွေမှာ အဆိပ်ငွေ့တွေ အသုံးပြုပြီး တိုက်ခိုက်ခဲ့တာ တွေ့ရပါတယ်။
ပြီးခဲ့တဲ့ ဖေဖော်ဝါရီ ၂၃ ရက်မှာ ရှမ်းမြောက် နောင်ချိုမြို့နယ်တိုက်ပွဲမှာ စစ်ကောင်စီတပ်ဘက်က အဆိပ်ငွေ့အသုံးပြုပြီး တိုက်ခိုက်ခဲ့တယ်လို့ တအာင်းတပ်မတော်-TNLA က ထုတ်ပြန်ထားပါတယ်။
စစ်ကောင်စီတပ်ဘက်ကတော့ တိုက်ပွဲတွေမှာ အဆိပ်ငွေ့ကို အသုံးပြု တိုက်ခိုက်ခဲ့တယ်ဆိုတဲ့ တော်လှန်ရေးအင်အားစုတွေရဲ့ ပြောကြားချက်ကို တစ်စုံတရာ တုန့်ပြန်ထားတာ မရှိသေးပါဘူး။
