မိုင်းရူပ၊ ဖေဖော်ဝါရီ ၁၄ ရက်
ထိုင်း-ကရင်နီနယ်စပ်ရှိ စစ်ကောင်စီရဲ့ နောက်ဆုံး လက်ကျန်တပ်စခန်းဖြစ်တဲ့ ပွိုင့် ၅၄၁၆ (စစ်ဆင်ရေး ခြေကုပ်စခန်း)ကို ကရင်နီ တပ်မတော်- KA က တိုက်ခိုက်သိမ်းပိုက်နိုင်ခဲ့တယ်လို့ KA အမှတ် ၅ တပ်ရင်းရဲ့ တာဝန်ရှိသူတစ်ဦးက ရွှေဖီမြေကို အတည်ပြုပါတယ်။
စစ်ကောင်စီတပ်ဖွဲ့ဝင် ၄၀ ဝန်းကျင် တပ်စွဲထားတဲ့ စစ်ဆင်ရေး ခြေကုပ်စခန်းကို ပြီးခဲ့တဲ့ ဖေဖော်ဝါရီ ၁၂ ရက်မှာ ကရင်နီ တပ်မတော်က လက်နက်ကြီးနဲ့ဒရုန်း အသုံးပြုပြီး တိုက်ခိုက်ရာ စစ်သားတွေ စခန့်စွန်ခွာပြီး မနေ့ ဖေဖော်ဝါရီ ၁၃ ရက်မှာ ခြေကုပ်စခန်းကို အပြီးသတ် တိုက်ခိုက်သိမ်းပိုက်နိုင်ခဲ့တာ ဖြစ်ပါတယ်။
“ကရင်နီပြည်ရဲ့ သံလွင်အရှေ့ဘက်ခြမ်းမှာရှိတဲ့ စခန်းပေါ့။ ထိုင်း-ကရင်နီနယ်စပ်မှာ နောက်ဆုံး လက်ကျန်စခန်းဖြစ်တယ်။ ဒရုန်း၊ လက်နက်ကြီးနဲ့ စပြီးတော့ တိုက်တာ။ ခွေး(စစ်ကောင်စီ) ဆုတ်ပြေးသွားတဲ့ အခြေအနေပါ” လို့ KA အမှတ် ၅ တပ်ရင်းရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
စစ်ဆင်ရေး ခြေကုပ်စခန်းဟာ ထိုင်း-ကရင်နီနယ်စပ်ရှိ စစ်ကောင်စီရဲ့ နောက်ဆုံး လက်ကျန်တပ်စခန်းဖြစ်ပြီး စခန်းအတွင်း စစ်တပ်ရဲ့ လက်နက်ခဲယမ်းတချို့နဲ့ ကား၊ ဆိုင်ကယ်တွေ သိမ်းဆည်းရမိခဲ့တယ်လို့ သူက ဆက်ပြောပါတယ်။
စစ်တပ်ဘက်ကတော့ စစ်ဆင်ရေး ခြေကုပ်စခန်း တိုက်ခိုက်သိမ်းပိုက်ခံရတာနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
ပြီးခဲ့တဲ့ ၂ဝ၂၄ ခုနှစ် ဒီဇင်ဘာ ၂၈ ရက်မှာလည်း ထိုင်း-ကရင်နီနယ်စပ်ရှိ ဆိုတရှားမြို့နယ်ထဲက စစ်ကောင်စီရဲ့ မယ်လယု တပ်စခန်းကို KA က တိုက်ခိုက်သိမ်းပိုက်ခဲ့ပြီး စစ်တပ်ရဲ့ လက်နက်ခဲယမ်းတွေ သိမ်းဆည်းရမိခဲ့ပါတယ်။
