ရွှေဖီမြေ၊ ဧပြီ ၃ ရက်၊ အင်းတော်
ကချင်တပ်မတော်- KIO/KIA ကလည်း ၃ ပတ်ကြာ အပစ်အခတ် ရပ်စဲမှာဖြစ်ကြောင်း မနေ့ ဧပြီ ၂ ရက် ညပိုင်းမှာ ထုတ်ပြန်လာပါတယ်။
ထုတ်ပြန်ချက် အပိုဒ်(၄)ပါ အကြောင်းအရာအချက်အလက်ကို တိုင်းရင်းသား တော်လှန်အဖွဲ့နဲ့ တော်လှန်ရေးတပ်ဖွဲ့သာမက စစ်ကောင်စီတပ်ဘက်ကလည်း လိုက်နာဖို့ လိုအပ်တယ်ဆိုပြီး ထုတ်ပြန်ချက်ထဲ ထည့်သွင်းရေးသားထားပါတယ်။
လူထုတွေကို စာနာတဲ့အနေနဲ့ ဧပြီ ၂ ရက်ကနေ လာမယ့် ဧပြီ ၂၂ ရက်အထိ ယာယီ အပစ်အခတ် ရပ်စဲမယ်ဆိုပြီး စစ်ကောင်စီက မနေ့ည ၈ နာရီခွဲကျော်မှာ ထုတ်ပြန်ထားတာပါ။
စစ်ကောင်စီရဲ့ ထုတ်ပြန်ချက်ထဲက အပိုဒ်(၄)မှာ ရေးသားထားတဲ့အကြောင်းအရာဟာ “ယာယီ ပစ်ခတ်တိုက်ခိုက်မှု ထုတ်ပြန်ကြေညာထားသည့်ကာလအတွင်း တိုင်းရင်းသား လက်နက်ကိုင်အဖွဲ့များနှင့် အခြားလက်နက်ကိုင်အဖွဲ့များအနေဖြင့် အများပြည်သူ သွားလာအသုံးပြုလျက်ရှိသည့် ဆက်သွယ်ရေး လမ်းကြောင်းများအား နှောင့်ယှက်တိုက်ခိုက်ခြင်းနှင့် ထိခိုက်ပျက်စီးစေခြင်း၊ ပြည်သူလူထု၏ အသက်အိုးအိမ်စည်းစိမ်ကို ထိခိုက်ပျက်စီးစေခြင်း၊ လုံခြုံရေးနှင့် တရားဥပဒေစိုးမိုးရေးတာဝန် ထမ်းဆောင်လျက်ရှိသည့် လုံခြုံရေးတပ်ဖွဲ့ဝင်များ၏ တပ်စခန်းများအား တိုက်ခိုက်ခြင်း၊ တပ်ဌာနချုပ်များကို နှောင့်ယှက်တိုက်ခိုက်ခြင်းများ၊ ငြိမ်းချမ်းရေးကို ထိခိုက်ပျက်စီးစေမည့် အင်အား စုဆောင်းခြင်း၊ ပြင်ဆင်စုဖွဲ့ခြင်း၊ နယ်မြေ ချဲ့ထွင်ခြင်းများကို မပြုရန်နှင့် ထိုကဲ့သို့ ဆောင်ရွက်လာပါက တပ်မတော်အနေဖြင့် ပြည်သူလူထုအား ကာကွယ်သောအားဖြင့် လိုအပ်သည့် အရေးယူ တုန့်ပြန်မှုများကို ဆောင်ရွက်သွားမည်ဖြစ်ကြောင်း အသိပေးထုတ်ပြန်အပ်ပါသည်”ဆိုပြီး ရေးသားထားတာပဲ ဖြစ်ပါတယ်။
ယာယီ အပစ်အခတ် ရပ်စဲမယ်လို့ ထုတ်ပြန်ထားတဲ့ စစ်တပ်ဟာ ဒီနေ့မနက် ၆ နာရီခန့်ကနေ ၆ နာရီခွဲအထိ စစ်ကိုင်းတိုင်း အင်းတော်မြို့နယ်ထဲ Y-12 Military Transport Aircraft ၁ စီးနဲ့ ဗုံးသီး ၃၁ လုံး ကြဲချတိုက်ခိုက်ခဲ့ကြောင်း လေကြောင်းအန္တရာယ်ကို စောင့်ကြည့်ပြီး မှတ်တမ်း တင်နေတဲ့ NAS- နပ်စ်က ထုတ်ပြန်ထားပါတယ်။
မတ်လ ၂၈ ရက်က ပြင်းထန်တဲ့ ငလျင် လှုပ်ခတ်မှု ဖြစ်ပွားခဲ့ပြီးနောက် NUG က ၂ ပတ်၊ ညီနောင်မဟာမိတ် ၃ ဖွဲ့က ၁ လကြာ ယာယီ အပစ်အခတ် ရပ်စဲကြောင်း ထုတ်ပြန်ထားပါတယ်။
