ခိုင်လေး၊ ဖေဖော်ဝါရီ ၂၄ ရက်၊ လက်ပံတန်း
ပဲခူးတိုင်း လက်ပံတန်းမြို့နယ် မှော်အင်းအုပ်စု မှော်အင်းရွာက အုပ်ချုပ်ရေးမှူး သန်းဦးဆိုသူဟာ ထွေအုပ်ရုံးသို့ စစ်မှုထမ်းစာရင်း သွားပို့စဉ် လမ်းမှာ ပစ်သတ်ခံခဲ့ရပါတယ်။
သာယာဝတီခရိုင် တပ်ရင်း(၃၈၀၂) တပ်ခွဲ ၂ နဲ့ ၃ ရဲဘော်တွေက ပစ်ခတ်လို့ ပွဲချင်းပြီးသေဆုံးခဲ့တယ်လို့ သာယာဝတီခရိုင် တပ်ရင်း(၃၈၀၂)မှ တာဝန်ရှိသူတစ်ဦးက ရွှေဖီမြေကို ပြောပါတယ်။
ဒီနေ့မနက် ၈ နာရီကျော်က အုပ်ချုပ်ရေးမှူး သန်းဦးနဲ့ အပေါင်းအပါ ပျူစောထီး ၁ ဦး၊ ရာအိမ်မှူး ၁ ဦးဟာ လက်ပံတန်းမြို့ဘက် ဆိုင်ကယ် စီးလာစဥ် လွှစင်ကုန်းတာဆုံနားမှာ သာယာဝတီခရိုင် PDF က သတင်းရလို့ စောင့်ကြိုပြီး တိုက်ခိုက်ခဲ့တာလို့ ဆိုပါတယ်။
“အုပ်ကြီးက ဆိုင်ကယ် ၁ စီး ပျူစောထီးနဲ့ရာအိမ်မှူးက ဆိုင်ကယ် ၁ စီးကို အတူစီးလာကြပါတယ်။ အနားရောက်မှ အုပ်ကြီးရဲ့ ရင်ဘတ်နဲ့ ခေါင်းတွေရော တခြားနေရာတွေရောကို သေနတ်နဲ့ ၁၂ ချက် ပစ်တာ ပစ်တဲ့နေရာမှာတင် သေပါတယ်။ အုပ်ကြီး သေတာမြင်ရော ပျူနဲ့ရာအိမ်မှူးက ဆိုင်ကယ်နဲ့ မောင်းထွက်ပြေးကြပါတယ်” လို့ သာယာဝတီခရိုင် တပ်ရင်း(၃၈၀၂)မှ တာဝန်ရှိသူတစ်ဦးက ပြောပါတယ်။
ပျုစောထီးနဲ့ ရာအိမ်မှူး ထွက်ပြေးသွားကြပြီးနောက် လက်ပစ်ဗုံး ၂ လုံး၊ ငွေသား ၁ သိန်း၊ ဆိုင်ကယ် ၁ စီး၊ စည်းတံဆိပ်တုံး ၂ ခု၊ မှတ်ပုံတင် ၂ ခု၊ စစ်မှုထမ်းရမယ့် နာမည်စာရင်းပါ စာရွက်စာတမ်းနဲ့ အခြားစာရွက်စာတမ်းတွေ သိမ်းဆည်းရမိခဲ့တယ်လို့ ဆိုပါတယ်။
လူငယ်တွေ စစ်မှုထမ်းဖို့ လူစုတာ၊ စစ်မှုထမ်းကြေး ကောက်တာ၊ ဒေသခံဆီကနေ ငွေ အတင်းအကြပ် ကောက်ခံပြီး ငွေမပေးသူတွေကို စစ်တပ်ကိုခေါ်ကာ ဖမ်းဆီးခိုင်းတာတွေ ပြုလုပ်နေတာကြောင့် အရေးယူရခြင်း ဖြစ်တယ်လို့ ဆိုပါတယ်။
သာယာဝတီခရိုင်အတွင်းမှာရှိတဲ့ ကျေးရွာတွေမှာ ဒေသခံတွေဆီကနေ စစ်မှုထမ်းကြေးဆိုပြီး လိုက်ကောက်နေတဲ့ အုပ်ကြီးနဲ့ ပျူစောထီးကို သာယာဝတီခရိုင် တပ်ရင်း(၃၈၀၂) တပ်ခွဲတွေက လိုက်လံ တိုက်ခိုက်လို့ ၆ ဦး သေဆုံးခဲ့ပြီ ဖြစ်ပါတယ်။
