ရွှေဖီမြေ၊ ဇွန်လ ၁ ရက်
မန္တလေးမြို့နယ်က မြေပြင်သပိတ်တွေမှာ ဦးဆောင်ပါဝင်ခဲ့တဲ့ ရတနာပုံတော်လှန်ရေးတပ်ဖွဲ့မှ ဗဟိုဦးဆောင်အဖွဲ့ဝင် ရဲဘော်ခွန်စိုင်း (ခ) ဗိုလ်ဒေါင်းဟာ တိုက်ပွဲအတွင်း ရန်သူရဲ့ကျည် ထိမှန်လို့ ကျဆုံးခဲ့တယ်လို့ ရတနာပုံ တော်လှန်ရေးတပ်ဖွဲ့ရဲ့ ထုတ်ပြန်ချက်အရ သိရပါတယ်။
သူဟာ မေလ ၂၈ ရက်က မြေပြင်တိုက်ပွဲအတွင်း မဟာမိတ်ပူးပေါင်းတပ်နဲ့အတူ စစ်ကောင်စီကို ရင်ဆိုင်တိုက်ခိုက်ချိန် ရင်ဘတ်တည့်တည့်ကို ကျည်ထိမှန်ခဲ့တာ ဖြစ်ပါတယ်။
ခွန်စိုင်း ကျဆုံးသွားတာဟာ တော်လှန်ရေးအတွက် ဆုံးရှုံးမှုကြီးတစ်ခုဖြစ်ပြီး မိသားစုတွေနဲ့အတူ ဝမ်းနည်း ကြေကွဲရကြောင်း ထုတ်ပြန်ချက်မှာ ရေးသားဖော်ပြထားပါတယ်။
သူ့ရဲ့ နာရေးကို မေလ ၃၁ ရက်မှာ ကျန်ရစ်သူ အဖွဲ့သားတွေနဲ့ မိသားစု၊ ဒေသခံလူထုတို့က ပြုလုပ်ပေးခဲ့ပြီး တော်လှန်ရေးမဟာမိတ်အသီးသီးမှ ပေးပို့ထားတဲ့ သဝဏ်လွှာများဖတ်ကြားတာနဲ့ ကျန်ရစ်သူ လူထုတွေက လွမ်းသူ့ပန်းခွေ ချတာတွေကို ပြုလုပ်ခဲ့တယ်လို့လည်း ဆိုပါတယ်။
စစ်အာဏာရှင်စနစ်ကို အသက်ပေး ကြိုးပမ်းတိုက်ခိုက်သွားတဲ့ ဗိုလ်ဒေါင်းရဲ့ စိတ်ဓာတ်၊ လုပ်ဟန်နဲ့ ရပ်တည်ချက်တွေကို စံနမူနာယူပြီး လက်နက်ကိုင်တော်လှန်ရေးကို တတ်စွမ်းသမျှ ဆက်လက်ဆင်နွှဲ တိုက်ပွဲဝင်သွားမယ်လို့လည်း ရတနာပုံတော်လှန်ရေးတပ်ဖွဲ့က ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
