မိုင်းရူပ၊ ဇန်နဝါရီ ၂၃ ရက်၊ ဖယ်ခုံ
ရှမ်းတောင်နဲ့ ကရင်နီနယ်စပ် ဖယ်ခုံမြို့နယ် မိုးဗြဲမြို့မှာ စစ်ကောင်စီတပ်နဲ့ ကရင်နီ တော်လှန်ရေး အင်အားစုတို့အကြား တိုက်ပွဲ ဆက်ဖြစ်နေတယ်လို့ ကရင်နီအမျိုးသားများ ကာကွယ်ရေးတပ်- KNDF ရဲ့ ဗဟိုသတင်းနဲ့ ပြန်ကြားရေးတာဝန်ခံက ရွှေဖီမြေကို ပြောပါတယ်။
ပြီးခဲ့တဲ့ ဇန်နဝါရီ ၁၉ ရက် နေ့လယ် ၃ နာရီခန့်မှာ ဖယ်ခုံအခြေစိုက် စစ်တပ်က ပစ်ခတ်တဲ့ လက်နက်ကြီးကြောင့် ဖယ်ခုံအရှေ့ဖက်ရှိ နန်းပလုံရွာမှာ ၂ လုံးနဲ့ လွယ်ပေါရွာမှာ ၁ လုံး ကျကွဲခဲ့ပြီး ကိုယ်ဝန်ဆောင်မိခင်တစ်ဦး ထိမှန်ဒဏ်ရာ ရခဲ့ပါတယ်။
“စစ်ကောင်စီဘက်က လက်နက်ကြီး ပစ်ခတ်တဲ့အတွက် လွယ်ပေါကျေးရွာက ကိုယ်ဝန်ဆောင်မိခင်တစ်ဦး စိုးရိမ်ဒဏ်ရာ ရခဲ့တယ်။ အရပ်သား ၂ ဦးလည်း ဒဏ်ရာ ရခဲ့တယ်” လို့ KNDF ရဲ့ ဗဟိုသတင်းနဲ့ ပြန်ကြားရေး တာဝန်ခံက ရွှေဖီမြေကို ပြောပါတယ်။
စစ်တပ်ဟာ မိုးဗြဲမြို့ကို ပြန်ထိန်းချုပ်ဖို့ ဖယ်ခုံမြို့ကနေ အင်အား အလုံးအရင်းနဲ့ ထိုးစစ်ဆင် တိုက်ခိုက်နေတာကြောင့် တိုက်ပွဲ ပြင်းထန်နေတာ ဖြစ်ပါတယ်။
မိုးဗြဲမြို့ရဲ့ နေရာအများစုကို ကရင်နီ တော်လှန်ရေး အင်အားစုတွေ ထိန်းချုပ်နိုင်ပေမဲ့ မြို့အနီးမှာ စစ်ကောင်စီရဲ့ ခြေမြန်တပ်ရင်း ၄၄၂ ကျန်ရှိနေပါတယ်။
စစ်တပ်ဘက်ကတော့ မိုးဗြဲမြို့တိုက်ပွဲနဲ့ ပတ်သက်ပြီး တစ်စုံတစ်ရာ ထုတ်ပြန်ထားတာ မရှိသေးပါဘူး။
