ခိုင်လေး၊ ဧပြီ ၃ ရက်၊ စစ်ကိုင်း
စစ်ကိုင်း မင်းကွန်းဒေသ ငလျင်ဒဏ်ကြောင့် ထိခိုက်သေဆုံးသူ အယောက် ၄၀ ကျော် ရှိလာနေပြီး ကယ်ဆယ်ရေးလုပ်ငန်းတွေမှာ ဒေသခံနဲ့ ဘုန်းကြီးတွေသာ ဦးဆောင်ပြီး လုပ်ဆောင်ပေးနေရတယ်လို့ မင်းကွန်းဒေသခံတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ မတ်လ ၂၈ ရက်က ပြင်းအား ၇.၇ အဆင့်ရှိတဲ့ ငလျင် လှုပ်ခတ်မှုကြောင့် မင်းကွန်းဒေသက မြသိန်းတန်စေတီအပါအဝင် တခြားစေတီပုထိုး လူနေအိမ်တွေ ပြိုကျပျက်စီးတာရှိပြီး ထိခိုက်ဒဏ်ရာရသူတွေလည်း ရှိခဲ့တယ်လို့ ဆိုပါတယ်။
“သေဆုံးတဲ့သူတွေက ၄၀ ကျော်နေပြီ။ အခုချိန်ထိလည်း ရှာေဖွနေတုန်းပါ။ ဒီမှာက စစ်တပ်ကနေပြီးတော့ လာရောက် ကူညီပေးတာ မရှိဘူး။ ဒီမှာက ဘုန်းကြီးကျောင်းတွေပြိုကျပျက်စီးတာရှိတော့ ဘုန်းကြီးတွေက ဦးဆောင်ပြီးမှဘဲ ကယ်ဆယ်ရေးတွေ လုပ်နေကြတယ်။ ဒီတော်လှန်ရေးတပ်တွေ စိုးမိုးနယ်မြေမှာတော့ သူတို့ဘက်ကနေပြီးတော့ ကယ်ဆယ်ရေးတွေ လုပ်ပေးနေတာတော့ ရှိတယ်”
ထိခိုက်ဒဏ်ရာရသူတွေထဲ စစ်ကောင်စီတပ်သားအပါအဝင် ဘုန်းကြီး၊ သီလရှင်နဲ့ ဒေသခံလည်း ပါဝင်ပြီး စစ်တပ်ဘက်က ဒီနေ့အထိ ကယ်ဆယ်ရေး လုပ်ပေးတာ မရှိသေးဘူးလို့ ဆိုပါတယ်။
ဒီနေ့ ဧပြီ ၃ ရက်အထိ တစ်နိုင်ငံလုံး အတိုင်းအတာအနေနဲ့ ငလျင်ဘေးကြောင့် သေဆုံးခဲ့သူ ၃,၀၈၅ ဦး၊ ဒဏ်ရာရသူ ၄,၇၁၅ ဦး၊ ပျောက်ဆုံးနေသူ ၃၄၁ ဦးရှိကြောင်း စစ်ကောင်စီက ထုတ်ပြန်ထားပါတယ်။
မတ်လ ၂၈ ရက် နေ့လယ် ၁ နာရီခန့်က စစ်ကိုင်းမြို့ကို ဗဟိုပြုပြီး အင်အားပြင်း ငလျင် လှုပ်ခတ်ခဲ့တာကြောင့် နေပြည်တော်၊ စစ်ကိုင်း၊ မန္တလေးတိုင်းထဲက မြို့နယ်ပေါင်း ၂၀ ကျော်မှာ လူသေဆုံးမှုနဲ့ အိုးအိမ်ထိခိုက်ပျက်စီးမှု များခဲ့ပြီး လက်ရှိအချိန်ထိ ကယ်ဆယ်ရေး ဆက်လက် လုပ်ဆောင်ပေးနေဆဲ ဖြစ်ပါတယ်။
