လွေးလာဝ်ဇာရ်၊ မတ်လ ၄ ရက်၊ သီပေါ
ရှမ်းမြောက် သီပေါမြို့နယ် နားမခေါ်ကျေးရွာအနီးက တာလုံလမ်းအဆင်းမှာ သတ်ဖြတ်ထားခံရတဲ့ အမျိုးသမီးအလောင်း ၃ လောင်း တွေ့ရှိထားတယ်လို့ ရွှေဖီမြေက စုံစမ်းသိရှိရပါတယ်။
အဲဒီအမျိုးသမီးအလောင်းတွေကို ပြီးခဲ့တဲ့ ဖေဖော်ဝါရီ ၂၃ ရက်မှာ လားရှိုးဘက်ကနေ ကားနဲ့ တင်လာပြီး လာရောက်စွန့်ပစ်သွားတာလို့ ဖြစ်စဉ်သိရှိသူတစ်ဦးက ရွှေဖီမြေသို့ ပြောပါတယ်။
ဖြစ်စဉ်သိရသူ တစ်ဦးက “အဲဒါလည်း ဒေသခံတွေ မပြောရဲကြဘူး။ ဘယ်သူ့လက်ချက်ဆိုတာ သိကြတယ်။ သတင်းပေါ်တက်ရင် သတ်ပစ်မယ်တဲ့။ အဲနားမခေါ်က လူတွေကို ခြိမ်းခြောက်ထားတာ။ အဖွဲ့အစည်းကားဘဲ။ မိန်းခလေး အလောင်း ၃ လောင်းကို ကားနဲ့တင်လာပြီး အဲမှာလာပစ်ထားတာ။ လားရိူးဘက်က ဆင်းသွားတဲ့ပုံလို့ ပြောကြတယ်” လို့ ပြောပါတယ်။
သတ်ဖြတ်ခံထားရတဲ့ အဲဒီအမျိုးသမီး ၃ ဦးဟာ အသက် ၁၂ နှစ်အရွယ်ကနေ ၁၈ နှစ်ကြားအရွယ်တွေ ဖြစ်ကြပြီး အဲအမျိုးသမီးတွေရဲ့ ခန္ဓာကိုယ်ပေါ်မှာလည်း ရိုက်နှက်နှိပ်စက်ခံထားရတဲ့ ဒဏ်ရာတွေ တွေ့ရတယ်လို့ နောက်ထပ် အမျိုးသမီးတစ်ဦးက ပြောပါတယ်။
“ကောင်မလေးတွေရဲ့ ခန္ဓာကိုယ်မှာလဲ ဒဏ်ရာတွေ အများကြီးပဲ။ နည်းတဲ့ ဒဏ်ရာတွေ မဟုတ်ဘူး။ နောင်ကော်ကြီးမှာ KTV ရှိတာတော့ မှန်ပေမဲ့ အဲဒီ KTV မှာ အလုပ်လုပ်နေတဲ့သူတွေ မဟုတ်ဘူး။ ဘယ်ကမှန်း မသိတဲ့ ကောင်မလေးတွေပါ။ အသက် ၁၂ ကနေ ၁၈ လောက်ပဲရှိတဲ့ ရုပ်တွေပါ။ အရမ်းငယ်ကြတယ်”
ရုပ်အလောင်း စွန့်ပစ်ခံထားရတဲ့ အဲဒီအမျိုးသမီးငယ်တွေဟာ ဘယ်သူဘယ်ဝါမှန်း မသိရသေးတဲ့အပြင် သူတို့ရဲ့ နေ့ရပ်လိပ်စာတွေလည်း မသိရဘူးလို့ ပြောပါတယ်။
သီပေါမြို့နယ်ထဲက အဲဒီနားမခေါ်ကျေးရွာဟာ ကိုးကန့်တပ်ဖွဲ့ MNDAA က ဝင်ထွက်သွားလာပြီး ၎င်းတို့ ထိန်းချုပ်ထားတဲ့ဒေသလည်း ဖြစ်တယ်လို့ သိရပါတယ်။
