လွေးလာဝ်ဇာရ်၊ ဇန်နဝါရီ ၁၄ ရက်၊ တန့်ယန်း
ကားပေါ်ကနေ ပြုတ်ကျပြီး ဒဏ်ရာ အပြင်းအထန် ရခဲ့တဲ့ ရှမ်းမြောက် တန့်ယန်းမြို့နယ် နားဟုတ်ကျေးရွာအုပ်စု လွယ်ပန်ရွာမှ ကိုရင်လေး ပျံလွန်တော်မူသွားပါတယ်။
ကိုရင်လေး နေမိန္ဒ (၁၁ နှစ်)ဟာ တောင်ကြီး ဆေးရုံမှာ ကုသမှု ခံယူရင်း ဦးနှောက်ယောင်ရောဂါနဲ့ မနေ့ ဇန်နဝါရီ ၁၃ ရက် ညနေ ၄ နာရီဝန်းကျင်မှာ ပျံလွန်တော်မူသွားကြောင်း ကူညီပေးနေသူ အမျိုးသားက ပြောပါတယ်။
“မနက်ပိုင်းမှာ သက်သာပြီပြောတော့ ကျနော်လည်း ဝမ်းသာနေတာ။ အစားလဲ စားနိုင်နေပြီ။ ညနေ လေးနာရီမှာ မတတ်နိုင်တော့ဘူးလို့ ဆရာဝန်က ပြောတယ်။ ဦးနှောက် ယောင်သွားလို့ စိုးရိမ်ရတယ်တဲ့။ ဦးနှောက်ယောင် ဖြစ်သွားတာ ခွဲစိတ်ဖို့လည်း အဆင်မပြေသေးတဲ့ အနေအထားမျိုး ဖြစ်နေတာ။ အဲဒီယောင်တာ အရင်ကုမယ်တဲ့ ပြီးမှ ခွဲသင့်ရင် ခွဲရမယ်ပေါ့”
တန့်ယန်းဆေးရုံကနေတဆင့် တောင်ကြီးဆေးရုံသို့ ပြီးခဲ့တဲ့ ဇန်နဝါရီ ၁၂ ရက်မှာ လွှဲပြောင်းခဲ့တာဖြစ်ပြီး တောင်ကြီးမှာ မကုသနိုင်ရင် မန္တလေးဆေးရုံသို့ လွှဲပြောင်းဖို့ စီစဉ်ခဲ့တာလို့ ၎င်းအမျိုးသားက ဆက်ပြောပါတယ်။
ကိုရင်လေးဟာ ပြီးခဲ့တဲ့ ဇန်နဝါရီ ၈ ရက်က ကားမရပ်သေးဘဲ ကားပေါ်ကနေ ခုန်ချတာကြောင့် ဒဏ်ရာ အပြင်းအထန် ရရှိခဲ့တာပဲ ဖြစ်ပါတယ်။
