အိုက်ပွီး၊ ဖေဖော်ဝါရီ ၇ ရက်၊ တမူး
စစ်ကိုင်းတိုင်း တမူးမြို့နယ်အထက်ပိုင်း ကျွန်းပင်သာနဲ့ မင်းသာရွာကို စစ်ကောင်စီတပ်နဲ့ပူးပေါင်းတပ်က မီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။
ကျွန်းပင်သာရွာမှာ တပ်စွဲထားတဲ့ စစ်တပ်နဲ့ပူးပေါင်းတပ်က မနေ့ ဖေဖော်ဝါရီ ၆ ရက် နေ့လယ် ၁ နာရီဝန်းကျင်မှာ ကျွန်းပင်သာရွာကို မီးရှို့ရာ လူနေအိမ် ၅ လုံးထက်မနည်း မီးလောင်ပျက်စီးသွားပါတယ်။
“ရွာမှာ လူတွေ မရှိတော့ဘူး။ တိုက်ပွဲ ဖြစ်ကတည်းက အကုန်ထွက်ပြေးတိမ်းရှောင်နေကြပါတယ်။ ဒိီနေ့ မီးရှို့တာ အဝေးကနေ မြင်နေရတယ်။ အိမ် ၅လုံးလောက် မီးလောင်နေတယ်။ ညနေအထိ မီးခိုး ထွက်နေတုန်းပါ” လို့ ဒေသခံတစ်ဦးက ရွှေဖီမြေသို့ ပြောပါတယ်။
အလားတူ ဖေဖော်ဝါရီ ၃ ရက်နဲ့ ၄ ရက်ကလည်း ကျွန်းပင်သာရွာနဲ့ တစ်ဆက်တည်းရှိတဲ့ မင်းသာရွာကို စစ်တပ်နဲ့ ပူးပေါင်းတပ်တွေက နှစ်ရက်ဆက်တိုက် မီးရှို့ဖျက်ဆီးသွားခဲ့တယ်လို့ သိရပါတယ်။
“စစ်သားတွေ မထောက်ခံတဲ့ နေအိမ်တွေ ရွေးပြီး နှစ်ရက်ဆက်တိုက် မီးရှို့တာပါ။ အိမ်တွေအတော်များ မီးလောင်ပြာကျတယ်လို့ သိရတယ်။ ရွာမှာ စစ်သားတွေ ရှိတယ်။ သူတို့ကို ထောက်ခံတဲ့ ပျူမိသားစုဝင်တွေ ရှိတယ်။ တခြားရိုးရိုးပြည်သူတွေက အကုန်ထွက်ပြေးကုန်ပြီ” လို့ ဒေသခံတစ်ဦးက ရွှေဖီမြေသို့ ပြောပါတယ်။
မင်းသာနဲ့ ကျွန်းပင်သာရွာဟာ တမူး-ကလေး ကားလမ်းပေါ် တည်ရှိပြီး စစ်တပ်နဲ့ ပျူစောထီး၊ ကသည်း၊ ရှမ်းနီတပ်တို့ ပူးပေါင်းတပ်စွဲထားပါတယ်။
မင်းသာနဲ့ ကျွန်းပင်သာရွာက စစ်တပ်စခန်းကို ပြီးခဲ့တဲ့ ဇန်နဝါရီ ၂၇ ရက်က တမူးခရိုင်တော်လှန်ရေး အင်အားစုတွေက တိုက်ခိုက်ခဲ့ပြီး ဒိီနေ့အထိ တိုက်ပွဲ ဖြစ်နေဆဲ ဖြစ်ပါတယ်။
စစ်ရေး တင်းမာနေတဲ့ တမူးမြို့ကို စစ်တပ်က အခုရက်ပိုင်းတွင်း ထောက်ပို့ရဟတ်ယာဥ်နဲ့ လူအင်အား၊ လက်နက်ခဲယမ်း ဖြည့်တင်းနေတယ်လို့ သိရပါတယ်။
