ရွှေဖီမြေ၊ ဩဂုတ် ၂၁ ရက်၊ နမ့်ဆန်
တအာင်းတပ်မတော် ထိန်းချုပ်ထားတဲ့ နမ့်ဆန်မြို့နယ် ဇယ်တုန်ဟုန်းကျေးရွာက နေအိမ်တစ်အိမ်ကို ဖောက်ထွင်းပြီး ရွှေနဲ့ငွေ ခိုးယူသွားတဲ့ အမျိုးသားတစ်ဦးကို ဖမ်းဆီးရမိခဲ့တယ်လို့ တအာင်းတပ်က မနေ့ ဩဂုတ် ၂၀ ရက်မှာ ထုတ်ပြန်ထားပါတယ်။
အဲဒီအမျိုးသားဟာ ပြီးခဲ့တဲ့ ဇွန်လ ၂၆ ရက်မှာ ဇယ်တုန်ဟုန်းရွာက နေအိမ်တစ်အိမ်ရဲ့ အိမ်နောက်တံခါးပေါက်ကို ဖောက်ထွင်းပြီး နေအိမ်ထဲရှိ ငွေသိန်း ၁၈၀၊ တရုတ်ငွေ ယွမ် ၂ သောင်း (ကျပ်သိန်း ၁၂၀)အပြင် တစ်ကျပ်သား ရွှေဆွဲကြိုးတစ်ကုံးတို့ကို ခိုးယူကာ ထွက်ပြေးခဲ့တာပဲ ဖြစ်ပါတယ်။
နေအိမ် ဖောက်ထွင်းခိုးယူမှုနဲ့ပတ်သက်ပြီး မြို့နယ် တအာင်းရဲတပ်ဖွဲ့က အဆင့်ဆင့် စုံစမ်းစစ်ဆေးမှု ပြုလုပ်ရာ ပြီးခဲ့တဲ့ ဇူလိုင်လထဲ အသက် ၄၅ နှစ်အရွယ် ဦးမောင်ငယ်ဆိုသူကို ဖမ်းမိခဲ့တာလို့ ဆိုပါတယ်။
လက်ရှိမှာတော့ အဲဒီအမျိုးသားကို မြို့နယ် တအာင်းရဲတပ်ဖွဲ့က ဖမ်းဆီးထိန်းသိမ်းထားပြီး ဥပဒေနဲ့အညီ အရေးယူ ဆောင်ရွက်သွားမယ်လို့ ထုတ်ပြန်ထားပါတယ်။
ဦးမောင်ငယ်ဟာ စစ်တပ် အုပ်ချုပ်ခဲ့စဉ်ကာလမှာလည်း မူးယစ်ဆေးဝါး သုံးစွဲမှုနဲ့ ထောင်ကျခဲ့ဖူးသူတစ်ဦး ဖြစ်တယ်လို့ ထုတ်ပြန်ချက်ထဲ ဖော်ပြထားပါတယ်။
အလားတူ ပြီးခဲ့တဲ့ ဧပြီ ၃ ရက်မှာလည်း နမ့်ဆန်မြို့နယ် မြို့သစ်ရွာမှာ အုပ်စုဖွဲ့ ဆိုင်ကယ် လိုက်ခိုးနေတဲ့ အမျိုးသား ၅ ဦးကို ဆိုင်ကယ် ၇ စီးနဲ့အတူ ဖမ်းမိခဲ့တယ်လို့ တအာင်းတပ်က ဧပြီ ၂၅ ရက်မှာ ထုတ်ပြန်ခဲ့ဖူးပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
