ရွှေဖီမြေ၊ ဧပြီ ၂၂ ရက်
တအာင်းပညာရေး အကယ်ဒမီကျောင်း- TEA အပတ်စဥ်(၂) သင်တန်းဆင်းပွဲကို ပြီးခဲ့တဲ့ ဧပြီ ၂၀ ရက်က တအာင်းဒေသတစ်နေရာမှာ ကျင်းပခဲ့တယ်လို့ တအာင်းတပ်က ဒီနေ့ ဧပြီ ၂၂ ရက်မှာ ထုတ်ပြန်လာပါတယ်။
TEA အပတ်စဉ်(၂)ကို ပြီးခဲ့တဲ့ ၂၀၂၄ ခုနှစ် ဇွန်လ ၃ ရက်မှာ စတင်ဖွင့်လှစ်ခဲ့တာဖြစ်ပြီး ကျောင်းသူ ၁၂၈ ဦး၊ ကျောင်းသား ၂၇ ဦး စုစုပေါင်း ၁၅၅ ဦး တက်ရောက်ခဲ့တယ်လို့ ဆိုပါတယ်။
လက်ရှိ သင်တန်းဆင်းပြီးတဲ့ ကျောင်းသူ ကျောင်းသားတွေဟာ တအာင်းပြည် ပညာရေးကောင်စီ- TLEC ဖွင့်လှစ်ထားတဲ့ အခြေခံပညာ စာသင်ကျောင်းတွေမှာ ဆရာဆရာမအဖြစ် တစ်နှစ် တာဝန်ထမ်းဆောင်ပြီးနောက် ပညာရေးဒီပလိုမာတန်း ဆက်လက် သင်ကြားနိုင်မယ်လို့ ထုတ်ပြန်ထားပါတယ်။
TEA အပတ်စဉ်(၁) ကျောင်းဆင်းပွဲကို ပြီးခဲ့တဲ့ ၂ဝ၂၄ ခုနှစ် ဧပြီလမှာ ကျင်းပခဲ့တာဖြစ်ပြီး အပတ်စဥ်(၃) သင်တန်းကျောင်းကိုတော့ လာမယ့် ဩဂုတ်လမှာ ဆက်လက် ဖွင့်လှစ်သွားမယ်လို့ သိရပါတယ်။
သင်တန်းဆင်းပွဲ အခမ်းအနားသို့ PSLF/TNLA ရဲ့ အထွေထွေ အတွင်းရေးမှူး(၂) ဗိုလ်မှူးကြီး တားပန်လ၊ တအာင်းသမိုင်းသုတေသနအဖွဲ့မှ ဒေါက်တာ အောင်မင်းဦး၊ TLEC နဲ့ TEA မှ တာဝန်ရှိသူအပါအဝင် စုစုပေါင်း လူဦးရေ ၅ဝဝ နီးပါး တက်ရောက်ခဲ့တယ်လို့ ဆိုပါတယ်။
