ရွှေဖီမြေ၊ မတ်လ ၃၁ ရက်
ငလျင်ဘေးသင့်သူတွေအတွက် တအာင်းအရပ်ဖက်အဖွဲ့အစည်း- TCSOs က သိန်း ၂၂၀ နဲ့ ကိုးရီးယားရောက် တအာင်းအသင်းက သိန်း ၁၀၀ မတည်ပြီး မြို့နယ် ၆ ခုမှာ TCSO က အလှူငွေ ကောက်ခံသွားမယ်လို့ ဒီနေ့ မတ်လ ၃၁ ရက်မှာ ထုတ်ပြန်လာပါတယ်။
ပြီးခဲ့တဲ့ မတ်လ ၂၈ ရက်က လှုပ်ခတ်သွားတဲ့ ၇.၇ ပြင်းအားရှိတဲ့ မြေငလျင်ကြောင့် လူသားချင်း စာနာထောက်ထားမှုအနေနဲ့ သဘာဝဘေးဒဏ်သင့်သူနဲ့အတူ အခက်အခဲ ရင်ဆိုင်ကျော်ဖြတ်နိုင်အောင် TCSOs အနေနဲ့ ငလျင်ဘေးဒဏ်သင့်သူတွေအတွက် သိန်း ၂၂၀ မတည်လှူဒါန်းသွားမယ်လို့ ထုတ်ပြန်ချက်မှာ ဖော်ပြထားပါတယ်။
ဒါ့အပြင် တအာင်းတပ်မတော် ထိန်းချုပ်ထားတဲ့ နမ့်ခမ်း၊ ကွတ်ခိုင်၊ နမ့်ဆန်၊ ကျောက်မဲ၊ မိုးကုတ်၊ နမ္မတူ စတဲ့မြို့နယ် ၆ မြို့နယ်မှာ အလှူခံဌာန ဖွင့်လှစ်သွားမှာဖြစ်ပြီး ပြည်တွင်းပြည်ပ အလှူရှင်နဲ့ မဟာမိတ်အဖွဲ့အစည်းတွေ တတ်စွမ်းသလောက် TCSOs နဲ့အတူ လက်တွဲကာ “ပြည်သူမှ ပြည်သူသို့ People to People” နဲ့ ပါဝင်လှူဒါန်းပေးကြဖို့ တိုက်တွန်းနှိုးဆော်ကာ အသိပေးထားပါတယ်။
မြေငလျင်ဘေးအန္တရာယ်နဲ့ ကြုံတွေ့နေရတဲ့ အချိန် ဖြစ်တဲ့အတွက် စစ်ကောင်စီတပ်ဘက်က လေကြောင်းနဲ့ ဗုံးကြဲတိုက်ခိုက်တဲ့ အကြမ်းဖက်မှု လုပ်ရပ်တွေကို ချက်ချင်းရပ်တန့်ပြီး လူသားချင်း စာနာထောက်ထားမှုနဲ့ ကူညီကယ်ဆယ်ရေးဆိုင်ရာ လုပ်ငန်းတွေကို အားစိုက် လုပ်ဆောင်သင့်တယ်လို့ ဖော်ပြထားပါတယ်။
အလားတူ ငလျင်ဘေးသင့်သူတွေကို ထောက်ပံ့ကူညီနိုင်ဖို့အတွက် ကိုရီးယားရောက် တအာင်း(ပလောင်)အသင်းကလည်း ကျပ်သိန်း ၁၀၀ မတည်လှူဒါန်းထားတယ်လို့ ထုတ်ပြန်ထားပါတယ်။
ပြီးခဲ့တဲ့ မတ်လ ၂၈ ရက်က မန္တလေးမြို့ အရှေ့မြောက်ဘက် ၂၀ ကီလိုမီတာခန့်အကွာကို ဗဟိုပြုပြီး လှုပ်ခတ်ခဲ့တဲ့ ငလျင်ဟာ ပြင်းအား ၇.၇ အဆင့်ရှိပြီး မန္တလေး၊ စစ်ကိုင်း၊ နေပြည်တော်နဲ့ ရှမ်းတောင်မှာ သေဆုံးသူနဲ့ ဒဏ်ရာရသူ များခဲ့ပါတယ်။
ငလျင်ကြောင့် ဒီနေ့ မတ်လ ၃၁ ရက်အထိ တစ်နိုင်ငံလုံး အတိုင်းအတာအနေနဲ့ သေဆုံးသူ ၃,၁၉၅ ဦးနဲ့ ဒဏ်ရာရသူ ၄,၅၆၅ ဦးအထိရှိလာပြီး ပျောက်ဆုံးသူ ၄၉၈ ဦး ရှိနေကြောင်း DVB Data Team က ကောက်ယူစုဆောင်းထားတဲ့ စာရင်းတွေအရ သိရပါတယ်။
