မိုင်းရူပ၊ နိုဝင်ဘာ ၁၁ ရက်၊ မိုးကုတ်
စစ်ကောင်စီကို ပြန်ပေးမယ့် မန္တလေးတိုင်း မိုးကုတ်မြို့မှာ တအာင်းတပ်မတော်- PSLF/TNLA က မြို့ခံတွေကို မိုးကုတ်ဂေါက်ကွင်းမှာ ကျောက်တူးဖော်မှု ခွင့်ပြုပေးထားတယ်လို့ ရွှေဖီမြေက စုံစမ်းသိရှိရပါတယ်။
တအာင်းတပ်က မိုးကုတ်မြို့ကို စစ်ကောင်စီထံ ပြန်ပေးမယ်လို့ သဘောတူပြီးနောက် အရင်က ကျောက်လုပ်ငန်းရှင်တွေကို တူးဖော်ခွင့် ပေးခဲ့တဲ့ မိုးကုတ်ဂေါက်ကွင်းထဲက နေရာတချို့မှာ မြို့ခံတွေကို တနိုင်တပိုင် တူးဖော်ခွင့် ပြန်ပေးတာပဲ ဖြစ်ပါတယ်။
“အရင်က ကုမ္ပဏီတွေကို တူးဖော်ခွင့် ပေးထားတဲ့နေရာတွေကို ဒေသခံတွေ ပေးလုပ်တာ။ အလကားတော့ မဟုတ်ဘူး။ ကျောက်ရရင် TNLA ကို ရာခိုင်နှုန်းနဲ့ ပြန်ပေးရတာ” လို့ မိုးကုတ်မြို့ခံတစ်ဦးက ရွှေဖီမြေကို ပြောပါတယ်။
မိုးကုတ်ဂေါက်ကွင်းဟာ ကျောက်အများဆုံးထွက်တဲ့နေရာဖြစ်ပြီး လက်ရှိ မိုးကုတ်မြို့မှာ ကျောက်ကုမ္ပဏီတချို့ကလည်း ကျောက်မျက်တူးဖော်မှု ဆက်လုပ်နေတယ်လို့ သိရပါတယ်။
တရုတ်နိုင်ငံ ကြားဝင်မှုကြောင့် စစ်တပ်နဲ့ တအာင်းတပ်တို့ အပစ်ရပ်ဖို့ သဘောတူပြီးနောက် တအာင်းတပ်က ၎င်းတို့ ထိန်းချုပ်ထားတဲ့ မိုးကုတ်နဲ့ မိုးမိတ်မြို့နယ်ကို စစ်ကောင်စီထံ ပြန်လည်လွှဲပြောင်းပေးရမှာ ဖြစ်ပါတယ်။
လာမယ့် နိုဝင်ဘာ ၂၀ ရက်မှာ မိုးကုတ်နဲ့ မိုးမိတ်မြို့နယ်မှာ တအာင်းတပ်ရဲ့ အုပ်ချုပ်ရေးလုပ်ငန်း ရပ်ဆိုင်းမှာဖြစ်ပြီး တအာင်းတပ်က နိုဝင်ဘာ ၂၅ ရက် နောက်ဆုံးထားပြီး မြို့တွင်းကနေ ဆုတ်ခွာမယ်လို့ သတင်းတွေ ထွက်ပေါ်နေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
