မိုင်းပန်ပျော်၊ ဧပြီလ ၃၀ ရက်၊ သီပေါ
တအာင်းတပ်မတော်-TNLA ထိန်းချုပ်ထားတဲ့ ရှမ်းမြောက် သီပေါမြို့မှာ လေပြင်းတိုက်ခတ်လို့ ဆိုင်ခန်းတွေအပေါ် သစ်ပင်ကျိုးကျပြီး ဆိုင်ခန်းတစ်ဆိုင်ပျက်စီးသွားခဲ့တယ်လို့ ရွှေဖီမြေက သိရှိရပါတယ်။
မနေ့က ဧပြီလ ၂၉ ရက် ညနေ ၄ နာရီ ဝန်းကျင် သီပေါမြို့ မြို့လယ်ရပ်ကွက် မိုင်းပွန်လမ်းဘေး အကင်ဆိုင်ကပ်ရပ်မှာရှိတဲ့ ဆိုင်ကယ်ဝပ်ရှော့ဆိုင်အပေါ်ကို သစ်ပင်ကျိုးကျခဲ့တာဖြစ်တယ်လို့ သီပေါမြို့ဒေသခံအမျိုးသားတစ်ဦးက ရွှေဖီမြေကိုပြောပါတယ်။
“မနေ့ညနေ ၄ နာရီကျော်။ ဆိုင်ကယ်ပြင်ဆိုင်ဗျ။ ဘေးမှာ ကွမ်းယာဆိုင်ရှိမယ်။ ဆိုင်ကယ်ပြင်ဆိုင်ကို အကုန်လုံးပိသွားပြီး ဘေးဆိုင်ကို အနည်းအကျဉ်းတော့ထိတယ်။ လူတွေကတော့ သစ်ပင်ကျိုးသံကြားပြီး ထွက်ပြေးကြတော့ မထိလိုက်ဘူး”
ဆိုင်အပေါ်ကျိုးကျတဲ့ သစ်ပင်ကို သီပေါမြို့ မီးသတ်တပ်ဖွဲ့ နှလုံးသားပရဟိတအသင်း ဝိုင်းဝန်းကူရှင်းခဲ့တယ်လို့ ၎င်းက ဆက်ပြောပါတယ်။
အလားတူ မနေ့က ဧပြီလ ၂၉ ရက် လားရှိုးမြို့နယ် မိုင်းယော်တိုက်နယ် ရွာသစ်ရွာမှာ မိုးကြိုးပစ်ခံရတဲ့ အမျိုးသမီးတစ်ဦး ဒဏ်ရာရခဲ့ပြီး လေပြင်းမုန်တိုင်းတိုက်ခတ်မှုကြောင့် နေအိမ်တစ်ချို့လည်း ပျက်စီးခဲ့ပါတယ်။
