ရွှေဖီမြေ၊ မတ်လ ၂၈ ရက်
မြေငလျင် လှုပ်ခတ်မှုကြောင့် အပျက်အစီးများတဲ့နေရာ ၆ ခုကို စစ်ကောင်စီရဲ့ အမျိုးသား သဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီက အရေးပေါ်အခြေအနေ ကြေညာလိုက်ပါတယ်။
ဒီနေ့ မတ်လ ၂၈ ရက် နေ့လယ် ၁၂ နာရီ ၅၁ မိနစ်မှာ မန္တလေးမြို့ အရှေ့မြောက်ဘက် ၂၀ ကီလိုမီတာခန့်အကွာကို ဗဟိုပြုပြီး ပြင်းအား ၇ ဒသမ ၇ အဆင့်ရှိ မြေငလျင်တစ်ခု လှုပ်ခတ်ခဲ့ပါတယ်။
ငလျင်လှုပ်ခတ်မှုကြောင့် အပျက်အစီးများခဲ့တဲ့ စစ်ကိုင်းတိုင်း၊ မန္တလေးတိုင်း၊ မကွေးတိုင်း၊ နေပြည်တော်ကောင်စီနယ်မြေ၊ ပဲခူးတိုင်းနဲ့ ရှမ်းပြည်နယ် အရှေ့မြောက်ဒေသကို အရေးပေါ်အခြေအနေ ကြေညာခဲ့တာ ဖြစ်ပါတယ်။
ဒါ့အပြင် ငလျင်လှုပ်ခတ်ပြီး နောက်ထပ် ၆ နာရီအတွင်း နောက်ဆက်တွဲ ငလျင်ငယ် ဆက်လှုပ်လာနိုင်တာကြောင့် လူထုတွေအနေနဲ့ ဘေးလွတ်ရာ တိမ်းရှောင်ကြဖို့လည်း ထုတ်ပြန်ချက်မှာ ဖော်ပြထားပါတယ်။
ငလျင်ကြောင့် နိုင်ငံတစ်ဝှမ်းက အထပ်မြင့်အဆောက်အုံ၊ ဘာသာရေးကျောင်းနဲ့ သမိုင်းဝင် အဆောက်အအုံ၊ စေတီပုထိုးတချို့ ပြိုကျပျက်စီးတာတွေ ရှိသလို လူထု ထိခိုက်သေဆုံးမှုလည်း ရှိနေပြီး အရေအတွက် အတိအကျကိုတော့ မသိရသေးပါဘူး။
