အိုက်ပွီး၊ ဇူလိုင်လ ၁၈ရက်၊ ရခိုင်
အာရက္ခတပ်တော်-AA ထိန်းချုပ်ထားတဲ့ ရခိုင်ပြည်နယ်က မြို့နယ်တွေမှာ စတားလင့်အင်တာနက် အသုံးပြုခ စျေးနှုန်း တစ်နာရီကို ၂,၀၀၀ ကျပ်နဲ့ တပြေးညီ AA က သတ်မှတ်လိုက်တယ်လို့ ဒေသခံတွေက ရွှေဖီမြေသို့ ပြောပါတယ်။
အရင်က AA ထိန်းချုပ်နယ်မြေက မြို့နယ်တွေမှာ စတားလင့်အင်တာနက် အသုံးပြုခ စျေးနှုန်း တစ်နာရီကို ၅,၀၀၀ ကျပ်ကနေ ၁၀,၀၀၀ ကျပ်ထိရှိပြီး မနေ့ ဇူလိုင်လ ၁၇ ရက်နေ့မှစ၍ တစ်နာရီ ၂,၀၀၀ ကျပ် သတ်မှတ်လိုက်တာဖြစ်ပါတယ်။
“အရင်က တစ်မြို့နယ်နဲ့တစ်မြို့နယ်၊ တစ်နေရာနဲ့တစ်နေရာ အင်တာနက်အသုံးပြုခ စျေးနှုန်း မတူကြဘူး။ တချို့မြို့နယ်တွေမှာ တစ်နာရီ ၅,၀၀၀ ကျပ်၊ တချို့နေရာတွေမှာ ၁၀,၀၀၀ ကျပ်ထိ ပေးရပါတယ်။ ဒါကို စျေးလျှော့ပေးဖို့နဲ့ တပြေးညီ စျေးသတ်မှတ်ပေးဖို့ ပြည်သူတွေက တောင်းဆိုလိုက်လို့ အခုလို ဖြေလျှော့ပေးတာနေမယ်”လို့ ကျောက်တော်ဒေသခံတစ်ဦးက ရွှေဖီမြေသို့ ပြောပါတယ်။
ဒါပေမယ့် သတ်မှတ်တဲ့ စျေးနှုန်းထက် ပိုကောက်ခံသူတွေကို AA အနေနဲ့ ဘယ်လိုအရေးယူဆောင်ရွက်သွားမယ်ကို ပြောဆိုထားတာ မရှိသေးဘူးလို့ ဆိုပါတယ်။
“AA က အခုလို တပြေးညီ စျေးသတ်မှတ်ပေးလိုက်တာ ကောင်းပါတယ်။ ပြည်သူတွေလည်း အဆင်ပြေကြတယ်။ ဒါပေမယ့် သတ်မှတ်စျေးထက် ကောက်ခံမူတွေရှိရင် ဘယ်လိုအရေးဆောင်ရွက်မလဲပေါ့။ ဒါကိုပြောဆိုတာမရှိသေးဘူး။ အရင်ကလည်း AA ရဲ့ ဗဟိုညွန်ကြားချက်နဲ့ ကောက်ခံတာမဟုတ်ဘဲ အောက်ခြေမှာ စျေးကောက်ချင်သလိုကောက်နေကြတယ်။ အခုလည်း အဲလိုဖြစ်မှာလည်း စိုးရိမ်ရတယ်။ ဒါကြောင်း သတ်မှတ်စျေးထက် ကောက်ခံမူတွေရှိရင် ဘယ်လိုအရေးဆောင်ရွက်မလဲပေါ့။”လို့ ပုဏ္ဏားကျွန်းဒေသခံတစ်ဦးက ရွှေဖီမြေသို့ ပြောပါတယ်။
AA ထိန်းချုပ်ထားတဲ့မြို့နယ်တွေမှာ စစ်ကောင်စီက ဆက်သွယ်ရေး ဖုန်းလိုင်းတွေ၊ အင်တာနက် ပိတ်ထားတဲ့အတွက် AA က ပြည်သူတွေ အင်တာနက် သုံးစွဲခွင့်ရရေး အခကြေးငွေယူပြီး စတားလင့်တွေ တပ်ဆင်ပေးထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
