ရွှေဖီမြေ၊ မတ်လ ၂၄ ရက်၊ မိုင်းရှူး
ရှမ်းတောင် မိုင်းရှူးမြို့နယ်ထဲ ရောက်ရှိလာတဲ့ ကျားဖျန့်ငွေလိမ်ဂိုဏ်းတစ်ခုကို ရှမ်းတပ်မတော်- SSPP/SSA က ဖမ်းဆီးခဲ့ပါတယ်။
တရုတ်နိုင်ငံသားတချို့နဲ့အတူ ငွေလိမ်လုပ်ငန်း လုပ်ကိုင်သူနဲ့ ဆက်စပ်ပစ္စည်းကိုလည်း သိမ်းဆည်းရမိခဲ့ကြောင်း SSPP က ဒီနေ့ မတ်လ ၂၄ ရက်မှာ ထုတ်ပြန်လာပါတယ်။
မနေ့ မတ်လ ၂၃ ရက် မနက်အစောပိုင်းက မိုင်းရှူးမြို့နယ် မန်ကျောင်းကျေးရွာအုပ်စုရှိ တောတွင်းတစ်နေရာမှာ တရုတ်နိုင်ငံသားတချို့နဲ့ ကျားဖျန့်လုပ်ကိုင်သူအပြင် ဖုန်းမျိုးစုံ၊ I Pad၊ ကွန်ပျုတာမျိုးစုံ သိမ်းဆည်းရမိခဲ့တာလို့ ဆိုပါတယ်။
ဖမ်းဆီးရမိထားတဲ့ တရုတ်နိုင်ငံသားကိုတော့ တရုတ်နိုင်ငံသို့ ပြန်လည် လွှဲပြောင်းပေးမှာဖြစ်ကြောင်း ထုတ်ပြန်ချက်ထဲ ရေးသားထားပါတယ်။
SSPP အုပ်ချုပ်တဲ့နေရာအတွင်း ကျားဖျန့်ဂိုဏ်း အဖွဲ့လိုက်ဖြစ်စေ၊ တစ်ဦးချင်းဖြစ်စေ လက်ခံမထားကြဖို့၊ လူထုတွေအပြင် တပ်မှူး၊ ဌာနမှူးအဆင့်ဆင့်နဲ့ အုပ်ချုပ်ရေးတာဝန်ခံ အဆင့်ဆင့်တွေကိုလည်း ပြီးခဲ့တဲ့နှစ် မေလ ၁၃ ရက်ကတည်းက အမိန့်ထုတ်ပြန်ခဲ့ပြီး ကျားဖျန့်ဂိုဏ်းနဲ့ ပါဝင်ပတ်သက်ကြောင်း သိရှိပါက ထိရောက်စွာ ဖမ်းဆီးအရေးယူသွားမယ်လို့ SSPP က ပြောဆိုထားပါတယ်။
အချက်အလက် အသေးစိတ်ကို သိရှိနိုင်ဖို့ SSPP ရဲ့ ပြောရေးဆိုခွင့်ရှိသူတွေကို ရွှေဖီမြေက စာပို့တဲ့အပြင် ဖုန်းနဲ့လည်း ဆက်သွယ်ပေမဲ့ ဆက်သွယ်လို့ မရခဲ့ပါဘူး။
