မိုင်းရူပ၊ ဖေဖော်ဝါရီ ၂၃ ရက်၊ ဆီဆိုင်
ရှမ်းတောင်မှာ လက်နက်ကိုင်တွေဆီ အခွန်ဆောင်ပြီး ဒေသခံတွေ စိုက်ပျိုးထားတဲ့ ဘိန်းတွေ စတင်ခြစ်ထုတ်နေပြီး ဘိန်းတစ်ပိဿာကို ၁၀ သိန်းကျပ်ဝန်းကျင် ရနေပါတယ်။
ဆီဆိုင်၊ ဟိုပုံး၊ ပင်လောင်း၊ မိုင်းကိုင်၊ လွိုင်လင်၊ လဲချား စတဲ့မြို့နယ်တွေမှာ ဘိန်းတွေကို ဒေသတွင်း လှုပ်ရှားတဲ့ လက်နက်ကိုင်တွေရဲ့ ခွင့်ပြုချက်နဲ့ အဓိက စိုက်ပျိုးကြတာဖြစ်တယ်လို့ ဆီဆိုင်ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“မြို့အနီးတော့ မစိုက်ကြဘူး။ မြို့နဲ့ဝေးတဲ့ နေရာတွေပေါ့။ လက်နက်ကိုင်တိုင်းကို ပေးရတာဘဲ။ အခု ဘိန်းခြစ်တဲ့ရာသီလေ။ တစ်ပိဿာကို ၁၀ သိန်းလောက် ရတယ်လို့ သိရတယ်”
ဒေသခံတွေ ဘိန်းစိုက်ပျိုးခွင့်ရဖို့ ဒေသတွင်း လှုပ်ရှားတဲ့ လက်နက်ကိုင်တွေကို ရွာအလိုက် သတ်မှတ်ထားတဲ့ ပမာဏအတိုင်း ပေးရတာဖြစ်တယ်လို့ သူက ဆက်ပြောပါတယ်။
ဆီဆိုင်၊ ဟိုပုံးနဲ့ ပင်လောင်း၊ မိုင်းကိုင်၊ လွိုင်လင်၊ လဲချား စတဲ့မြို့နယ်တွေမှာ စစ်ကောင်စီတပ်၊ ပအိုဝ်းပြည်သူ့စစ်- PNA၊ ရှမ်းပြည်တိုးတက်ရေးပါတီ- SSPP နဲ့ သျှမ်းပြည်ပြန်လည်ထူထောင်ရေးကောင်စီ- RCSS တို့ သွားလာလှုပ်ရှားကြပါတယ်။
ကုလသမဂ္ဂ မူးယစ်ဆေးဝါးနဲ့ ရာဇဝတ်မှု နှိမ်နင်းရေးအဖွဲ့- UNODC က ၂၀၂၄ ခုနှစ် ဒီဇင်ဘာ ၁၂ ရက်ထုတ် အစီရင်ခံစာအရ မြန်မာနိုင်ငံရဲ့ ဘိန်းစိုက်ပျိုးမှုဟာ ၂၀၂၄ ခုနှစ်မှာ အနည်းငယ် ကျဆင်းခဲ့ပေမဲ့ ဘိန်းစိုက်ပျိုးထုတ်လုပ်မှု အများဆုံးနိုင်ငံအဖြစ် ဆက်လက် ရပ်တည်နေတယ်လို့ ဖော်ပြထားပါတယ်။
ဘိန်းစိုက်ပျိုးတဲ့အထဲမှာ ရှမ်းပြည်နယ်ဟာ ဘိန်းစိုက်ပျိုးထုတ်လုပ်မှု အများဆုံးဒေသအဖြစ် ၈၈ ရာခိုင်နှုန်းအထိ ရှိနေတယ်လို့ UNODC ရဲ့ အစီရင်ခံစာမှာ ဖော်ပြထားပါတယ်။
