မိုင်းပန်ပျော်၊ မတ်လ ၁၂ ရက်၊ ကွတ်ခိုင်
တအာင်းတပ်မတော်- PSLF/TNLA ထိန်းချုပ်ထားတဲ့ ရှမ်းမြောက် ကွတ်ခိုင်မြို့နယ်က ကျေးရွာတချို့မှာ ပျက်စီးနေတဲ့စာသင်ကျောင်းတွေကို အသစ် ပြန်လည်တည်ဆောက်ဖို့ အကူအညီ လိုအပ်နေပါတယ်။
ကွတ်ခိုင်မြို့နယ်ထဲက ဝေးလံခေါင်ဖျားတဲ့ ကျေးရွာတချို့မှာ ဆင်းရဲချို့တဲ့လွန်းပြီး ကျောင်းလည်း ယိုယွင်းပျက်စီးနေတာကြောင့် အသစ် ပြန်ဆောက်ဖို့ အကူအညီ လိုအပ်နေတာလို့ တအာင်းပြည် ပညာရေးကောင်စီ- TLEC ရဲ့ ကွတ်ခိုင်မြို့နယ် ပညာရေးရုံးမှ တာဝန်ရှိသူတစ်ဦးက ရွှေဖီမြေကို ပြောပါတယ်။
“ကျောင်း ပြန်ဆောက်မယ့် ရွာတွေကတော့ မုံးစီး မုံးဟွမ်ဘက် ဖြစ်ပါတယ်။ အဲဖက်က ဝေးပြီးခေါင်တဲ့နေရာဖြစ်တော့ ရွာကလည်း စားဝတ်နေရေး အခက်အခဲဖြစ်တော့ သူတို့ကလည်း ကိုယ်ထူကိုယ်ထ လုပ်နိုင်တဲ့အနေအထား မရှိတော့ ရုံးဘက်ကလည်း ဘဏ္ဍာရေးငွေ အခက်အခဲ ဖြစ်နေတယ်။ ကျောင်းကတော့ အသစ်တွေ အကုန်လုံး ပြန်ဆောက်ရမယ်။ အဲဒီရွာတွေမှာ အရင်တုန်းက ကျောင်းမဟုတ်ဘူး။ တဲလိုဘဲလေ အဲကြောင့် အဲဒီကျောင်းတွေက ဒီနှစ်မလုပ်ရင် အဆင်မပြေဘူး။ အဲဒီဘက်က ရွာသားတွေလည်း ပူးပေါင်းဖို့ အားမရှိဘူး။ ရုံးအနေနဲ့ ကူညီမယ်ဆိုလည်း နည်းနည်းဘဲ ကူညီနိုင်မှာပေါ့နော်။ အဲ့ဒါကြောင့် အလှူရှင်တွေရှာပြီး အလှူရှင်တွေလည်း ပူးပေါင်းနိုင်ရင်တော့ ဒီနွေရာသီမှာ အပြီးဆောက်မယ်။ လာမယ့် ပညာသင်နှစ်မှာ ကလေးတွေကျောင်းတက်လို့ရအောင် လုပ်သွားမယ်”
ကျောင်းဆောင်အသစ် ဆောက်ဖို့အတွက် ငွေကြေးအပြင် တစ်ခြားကျောင်းဆောင်ဆောက်ဖို့ လိုအပ်တဲ့ ပစ္စည်းတွေကိုလည်း ကူညီနိုင်ပြီး ၅ သိန်းအထက်လှူဒါန်းသူတွေကို ပန်းချီပညာရှင်တွေ ရေးဆွဲထားတဲ့ ပန်းချီကားတွေ လက်ဆောင် ပေးသွားမယ်လို့ ပြောပါတယ်။
အခုလို နိုင်ငံရေးပြဿနာတွေကြား အားလုံးက ခက်ခဲနေတဲ့ကြားကာလမှာ ပညာရေးကလည်း ရပ်တန့်လို့ မရတာကြောင့် ပညာရေး ဖော်ဆောင်နေတဲ့အချိန်မှာ အဖက်ဖက်ကနေ ပံ့ပိုးကူညီမှု လိုအပ်တယ်လို့ ၎င်းက ဆက်ပြောပါတယ်။
ပြုပြင်မယ့် စာသင်ကျောင်းတွေဟာ လာမယ့် ၂၀၂၅-၂၀၂၆ ပညာသင်နှစ်မှာ TLEC က ဖွင့်လှစ်သွားမယ့်ကျောင်း ဖြစ်တယ်လို့ ဆိုပါတယ်။
TLEC ဟာ တအာင်းပြည်အတွင်းက ကျောင်းနေရွယ် ကျောင်းသူကျောင်းသားတွေ ပညာရေးအခွင့်အလမ်း ရရှိစေပြီး အရည်အသွေး ပြည့်မှီတဲ့ ပညာရေးစနစ် ဖြစ်ပေါ်လာစေဖို့နဲ့ ပညာရေးစနစ်ကို ပိုမိုကောင်းမွန်လာစေဖို့ ဦးတည်ပြီး အကောင်အထည်ဖော် ဆောင်ရွက်နေတာ ဖြစ်တယ်လို့ ဆိုပါတယ်။
