မိုင်းရူပ၊ မတ်လ ၁၂ ရက်
ကရင်နီပြည် ဒီးမော့ဆို၊ ဘောလခဲ၊ လွိုင်ကော်အရှေ့ခြမ်းနဲ ဖရူဆိုမြို့နယ်ရှိ စစ်ဘေးရှောင်စခန်းမှာ ရေရှားပါးမှုနဲ့ ကြုံနေရပြီး စစ်ရှောင်စခန်းတချို့မှာ အလှည့်ကျစနစ်နဲ့သာ ရေချိုးနေရတယ်လို့ ရွှေဖီမြေက စုံစမ်းသိရှိရပါတယ်။
ရာသီဥတု ပူပြင်းလာပြီး တောင်ကျရေတွေ ခန်းလာတာကြောင့် စစ်ရှောင်စခန်းတချို့မှာ ရေ ရရှိဖို့ မိုင်နဲ့ချီ သွားခပ်ရသလို ရေချိုးဖို့လည်း အလှည့်ကျစနစ်နဲ့သာ ချိုးနေရတယ်လို့ ဒီးမော့ဆို အနောက်ခြမ်းရှိ စစ်ဘေးရှောင် အမျိုးသမီးတစ်ဦးက ရွှေဖီမြေကို ပြောပါတယ်။
“ရေချောင်းကနေ ရေသွယ်ကြတယ်။ အခုက ရေထွက်ပေါက်က ခန်းလာပြီ။ တချို့နေရာမှာ ၃ ရက်တစ်ခါ ရေ ချိုးနိုင်ပေမဲ့ တချို့နေရာမှာ လူကြီးတွေက တစ်ပတ်တစ်ခါ တစ်လတစ်ခါပဲ ရေချိုးနိုင်တယ်။ ဖရူဆိုဘက်မှာဆိုရင် ရေထွက်ပေါက်ရှိတဲ့နေရာနဲ့ အဝေးကြီးပဲ ရေ သွားခပ်ရတယ်”
စစ်ရှောင်တွေ ရေရရှိဖို့ အရပ်ဖက်အဖွဲ့အစည်းတချို့ လာရောက် ကူညီပေးတာ ရှိပေမဲ့ လုံလောက်မှု မရှိသေးဘဲ အကူအညီ လိုအပ်နေတယ်လို့ စစ်ဘေးရှောင်တွေကို အကူအညီ ပေးနေတဲ့ Jobs for Kayah အဖွဲ့ရဲ့ တာဝန်ရှိသူ ကိုကောင်းမြတ်က ရွှေဖီမြေကို ပြောပါတယ်။
“ရေရရှိမှု အခက်ဆုံး အခြေအနေ အဆိုးဆုံးက ဖရူဆိုဖက်ပါ။ ဒီးမော့ဆို အနောက်ခြမ်းမှာတော့ စစ်ရှောင်အများစု ရှိတဲ့နေရာမှာ ရေ ရရှိနိုင်တဲ့ အရင်းအမြစ် ရှားလာတယ်။ ရေ ရနိုင်တဲ့နေရာက ဝေးတယ်။ အခု နွေရာသီ ရောက်တော့ တောင်ကျရေ၊ ကန်တွေမှာ ရေခန်းခြောက်ကုန်တော့ ပိုပြီး ခက်ခဲသွားတယ်”
စစ်ရှောင်စခန်းတချို့မှာတော့ ရေကို ဝယ်ယူသုံးစွဲနေရပြီး ရေပုံးအပြာ ၃ ပုံးပါတဲ့ ကားတစ်စီးကို ရေသယ်ရတဲ့ ခရီးအကွာအဝေးအပေါ် မူတည်ပြီး အနည်းဆုံး ၄ သောင်းခွဲကနေ ၇ သောင်းအထိ ပေးရတယ်လို့ သူက ဆက်ပြောပါတယ်။
ကရင်နီပြည်ရှိ စစ်ရှောင်စခန်းတွေမှာ နွေရာသီရောက်တိုင်း နှစ်စဥ်လိုလို ရေရှားပါးမှုဒဏ်ကို တွေ့ကြုံနေရတာလည်း ဖြစ်ပါတယ်။
စစ်တပ် အာဏာသိမ်းပြီးနောက်ပိုင်း ကရင်နီပြည်မှာ စစ်တပ်နဲ့ ကရင်နီ တော်လှန်ရေး အင်အားစုတွေအကြား တိုက်ပွဲကြောင့် နေရပ်စွန့်ခွာ ထွက်ပြေးနေရသူ ၂ သိန်း ရှိတယ်လို့ သိရပါတယ်။
